രാജ്യം വർഗ്ഗീയ വാദികളുടെ കൈകളിൽ അകപ്പെടു പോകുന്ന അപകടകരമായ അവസ്ഥയിലാണെന്നും സങ്കീർണ്ണമായ അവസ്ഥയിലൂടെയാണ് രാജ്യം കടന്ന് പോകുന്നതെന്നും രാജ്യസഭാ മെമ്പർ അഡ്വ: പി സന്തോഷ് കുമാർ പറഞ്ഞു. എല്ലാ മേഖലയിലും പരാജയപ്പെട്ട ഒരു കേന്ദ്ര സർക്കാരാണ് രാജ്യം ഭരിക്കുന്നത് എന്നും അദ്ദേഹം പറഞ്ഞു. അന്തരിച്ച കമ്മ്യൂണിസ്റ്റ് നേതാവ് കെ.പി തോമസ് ബാലേട്ടന്റെ സ്മാരക മന്ദിരത്തിന്റെ തറക്കല്ലിടൽ കർമ്മം നിർവഹിക്കൽ വേളയിൽ മാധ്യമങ്ങളോട് സംസാരിക്കവേയാണ് എം.പി നയം വ്യക്തമാക്കിയത്. കേന്ദ്ര സർക്കാരിന്റെ പരാജയം ജനം അനുഭവിച്ചു കൊണ്ടിരിക്കുകയാണ്. പെട്രോളിയം ഉത്പ്പന്നങ്ങളുടെ വിലക്കയറ്റം മുതൽ പൊതുമേഖലാ സ്ഥാപനങ്ങളുടെ വിറ്റഴിക്കൽ വരെ വിവിധ ആഘാതങ്ങൾ ജനങ്ങളുടെ മേൽ അടിച്ചേൽപ്പിക്കുകയാണ് കേന്ദ്ര സർക്കാർ. ജനജീവിതം ദുസഹമായ സാഹചര്യത്തിൽ കേന്ദ്ര സർക്കാരിനെതിരെ ജനവികാരം ഉയർന്നു വരേണ്ടത് അനിവാര്യമാണെന്നും എം പി അഭിപ്രായപ്പെട്ടു. മതേതര പ്രസ്ഥാനങ്ങളുടെ കൂട്ടായ്മ വളർന്ന് വരേണ്ടത് നാടിന്റെ ആവശ്യമാണെന്നും പി.സന്തോഷ്കുമാർ പറഞ്ഞു.
റിപ്പോർട്ട്: കെ.ബി. ഉത്തമൻ