തൃശൂര് :ചേര്പ്പ് പഞ്ചായത്ത് എട്ടുമനയില് ഫാമില് പന്നികള് ചത്തൊടുങ്ങുന്നത് ആഫ്രിക്കന് പന്നിപ്പനിമൂലമാണെന്ന് സ്ഥിരീകരിച്ചതിനെ തുടര്ന്ന് ഒരു കിലോമീറ്റര് ചുറ്റളവില് ഉള്ള മുഴുവന് ഫാമിലെയും പന്നികളെ കൊന്നൊടുക്കുവാന് ജില്ലാ കലക്ടര് ഉത്തരവിട്ടു. ഇന്ന് ഉച്ചക്ക് രണ്ടു മുതല് പന്നികളെ കൊന്നൊടുക്കുന്ന നടപടി ആരംഭിക്കും. ആ പ്രദേശത്തേക്ക് പൊതുജനങ്ങള് പോകാന് പാടില്ലെന്ന് അധികൃതര് നിര്ദ്ദേശം നല്കി.സമീപ പ്രദേശങ്ങളില് പന്നിയിറച്ചി വില്പന നടത്തുന്ന സ്ഥാപനങ്ങള് അടക്കണമെന്നും കലക്ടര് നിര്ദ്ദേശിച്ചു. 10 കിലോമീറ്റര് ചുറ്റളവിലുള്ള ഫാമുകള് നിരീക്ഷണത്തിലാണ്.പന്നികളെ കൊന്ന് സുരക്ഷാ മാനദണ്ഡങ്ങള് പാലിച്ച് സംസ്ക്കരിക്കേണ്ടതാണെന്ന് ജില്ലാ മൃഗസംരക്ഷണ ഓഫീസര് അറിയിച്ചു. ജില്ലയില് പന്നിപ്പനി സ്ഥിരീകരിച്ച സാഹചര്യത്തില് റവന്യൂ വകുപ്പ് മന്ത്രി കെ. രാജന്റെ അധ്യക്ഷതയില് ജില്ലാ കലക്ടര് ഹരിത വി കുമാറിന്റെ ചേംബറില് ചേര്ന്ന യോഗം സ്ഥിതിഗതികള് വിലയിരുത്തി. സി.സി മുകുന്ദന് എംഎല്എ, ജില്ലാ പഞ്ചായത്ത് പ്രസിഡന്റ് പി.കെ ഡേവിസ് മാസ്റ്റര്, ചേര്പ്പ് ഗ്രാമപഞ്ചായത്ത് പ്രസിഡന്റ് സുജിഷ കള്ളിയത്ത് തുടങ്ങിയവരും യോഗത്തില് പങ്കെടുത്തു.വയനാട്, കണ്ണൂര് ജില്ലകളില് പന്നിപ്പനി സ്ഥിരീകരിച്ച സാഹചര്യത്തില് തൃശൂര് ജില്ലയിലും നിരീക്ഷണം ശക്തമാക്കിയിരുന്നു. ഭോപ്പാലിലെ വൈറോളജി ലാബില് നടത്തിയ സാമ്പിള് പരിശോധനയിലാണ് ചേര്പ്പ് പഞ്ചായത്തിലെ പന്നിഫാമില് രോഗം സ്ഥിരീകരിച്ചത്. ഈ ഫാമിന് 10 കിലോമീറ്റര് ചുറ്റളവില് സ്ഥിതി ചെയ്യുന്ന ഫാമുകളിലെ പന്നികളെ നിരീക്ഷിക്കും. കൃത്യമായ ഇടവേളകളില് ഇവയുടെ രക്തം പരിശോധിക്കുന്നതിനും ആരോഗ്യം നിരീക്ഷിക്കുന്നതിനും പ്രത്യേക സംഘത്തെ നിയോഗിച്ചിട്ടുണ്ട്.രോഗബാധ കണ്ടെത്തിയ പ്രദേശത്തിന്റെ ഒരു കിലോമീറ്റര് ചുറ്റളവില് പന്നികള്, പന്നി മാംസം, പന്നിത്തീറ്റ എന്നിവ വാങ്ങുന്നതിനും വില്ക്കുന്നതിനും നിരോധനം ഏര്പ്പെടുത്തിയിട്ടുണ്ട്. പ്രതിരോധ
പ്രവര്ത്തനങ്ങള് ഏകോപിപ്പിക്കുന്നതിനായി ജില്ലാ ജന്തുരോഗ നിയന്ത്രണ പദ്ധതി ഓഫീസില് 24 മണിക്കൂറും പ്രവര്ത്തിക്കുന്ന കണ്ട്രോള് റൂമും സ്ഥാപിച്ചിട്ടുണ്ട്.