പാഷൻ ഫ്രൂട്ട് ഗ്രാമം പദ്ധതി: വിളവെടുപ്പ് നടത്തി

ജില്ലാ പഞ്ചായത്തിൻ്റെ പാഷൻ ഫ്രൂട്ട് ഗ്രാമം പദ്ധതിയുടെ ജില്ലാതല വിളവെടുപ്പ് കുറ്റ്യാട്ടൂർ പഞ്ചായത്തിലെ ചട്ടുകപ്പാറയിൽ

ജില്ലാ പഞ്ചായത്ത് പ്രസിഡണ്ട് പി പി ദിവ്യ ഉദ്ഘാടനം ചെയ്തു.

2021-22 വാർഷിക പദ്ധതിയിൽ ഉൾപ്പെടുത്തിയാണ് ജില്ലാ പഞ്ചായത്ത് പാഷൻ ഫ്രൂട്ട്  ഗ്രാമം പദ്ധതി നടപ്പാക്കിയത്. തെരഞ്ഞെടുത്ത 20 ഗ്രാമപഞ്ചായത്തുകളിലെ 200 കുടുംബശ്രീ ജെ എൽ ജി ഗ്രൂപ്പുകൾ പാഷൻ ഫ്രൂട്ട് കൃഷി ചെയ്തിട്ടുണ്ട്. പ്രാദേശിക വിപണിയിൽ വില്പന നടത്തി ബാക്കി വരുന്നവ മൂല്യവർദ്ധിത വിഭവങ്ങളാക്കി മാറ്റാനുള്ള സംരംഭങ്ങൾക്കായി ഈ വർഷം ജില്ലാ പഞ്ചായത്ത് പദ്ധതി തയ്യാറാക്കിയിട്ടുണ്ട്. കുറ്റ്യാട്ടൂർ പഞ്ചായത്തിൽ അഞ്ച് ജെ എൽ ജി ഗ്രൂപ്പുകളാണ് കൃഷി ചെയ്തത്. ചട്ടുകപ്പാറ വേശാല വാർഡിൽ ഭാഗ്യശ്രീ ഗ്രൂപ്പിന്റെ കൃഷിയിടത്തിൽ നടന്ന

ചടങ്ങിൽ പഞ്ചായത്ത് പ്രസിഡണ്ട് പി പി റെജി അധ്യക്ഷത വഹിച്ചു. ജില്ലാ പഞ്ചായത്ത് സ്ഥിരം സമിതി അധ്യക്ഷൻ വി കെ സുരേഷ് ബാബു, വാർഡ് അംഗം എ കെ ശശിധരൻ,  ജില്ലാ പഞ്ചായത്ത് സെക്രട്ടറി ഇൻ ചാർജ് സതീഷ് ബാബു, കുടുംബശ്രീ മിഷൻ ജില്ലാ കോ- ഓർഡിനേറ്റർ ഡോ.എം സുർജിത്ത്, കൃഷി ഓഫീസർ കെ കെ ആദർശ് , സി ഡി എസ് ചെയർപേഴ്സൺ സി ബിന്ദു തുടങ്ങിയവർ പങ്കെടുത്തു.