ടൂറിസം ശക്തിപ്പെടുത്താനും മേഖലയിലേക്ക് കൂടുതൽ നിക്ഷേപങ്ങൾ ക്ഷണിക്കാനും ലക്ഷ്യമിട്ട് നിക്ഷേപക സംഗമവുമായി ഇരിക്കൂർ മണ്ഡലം. സംസ്ഥാന സർക്കാർ വിഭാവനം ചെയ്ത 'ഒരു വർഷം ഒരു ലക്ഷം സംരംഭകർ' പദ്ധതിയുടെ ഭാഗമായാണ് നിക്ഷേപക സംഗമം നടത്തുന്നത്. ടൂറിസം പ്രൊമോഷന് വേണ്ടി മണ്ഡലത്തിൽ രൂപീകരിച്ച ഇരിക്കൂർ ടൂറിസം ഇന്നവേഷൻ കൗൺസിലാണ് പരിപാടിക്ക് നേതൃത്വം നൽകുന്നത്. പൈതൽമല വിഹാര ഹോട്ടലിൽ വെച്ച് രണ്ട് ദിവസങ്ങളിലായി നടന്ന പരിപാടി രാവിലെ 9.30ന് വ്യവസായ നിയമ കയർ വകുപ്പ് മന്ത്രി പി രാജീവ് ഉദ്ഘാടനം ചെയ്തു. അഡ്വ സജീവ് ജോസഫ് എംഎൽഎ അധ്യക്ഷത വഹിച്ചു. എംപിമാരായ കെ സുധാകരൻ, പി സന്തോഷ് കുമാർ എന്നിവർ പങ്കെടുത്തു. നവംബർ 21ന് നടന്ന സെമിനാറിൽ ഉദ്ഘാടനം കെ സുധാകരൻ എംപി നിർവഹിച്ചു.
സെമിനാറിൽ ടൂറിസം സാധ്യതകൾ, വ്യവസായ സംരംഭകത്വം, കൃഷിയും ടൂറിസവും, താമസ സജ്ജീകരണം സഞ്ചാരികൾക്ക് തുടങ്ങിയ വിഷയങ്ങളിൽ ക്ലാസുകൾ ഉണ്ടായി. ടൂറിസം വകുപ്പ് മന്ത്രി പി എ മുഹമ്മദ് റിയാസ് വീഡിയോ കോൺഫറൻസിലൂടെ ആശംസ അറിയിച്ചു.