പൈപ്പിലൂടെ പാചകവാതകം എത്തിക്കുന്ന സിറ്റിഗ്യാസ് പദ്ധതി മുന്നോട്ട്. കൂടാളി, മുണ്ടേരി ഭാഗങ്ങളിലായി 200 വീടുകളിലെ അടുക്കളയിൽ പാചകവാതകം എത്തിത്തുടങ്ങി.
കൂടുതൽ വീടുകളിൽ കണക്ഷൻ നൽകിവരികയാണ്. ഇതിനകം രജിസ്റ്റർ ചെയ്ത നാനൂറിൽ അധികം വീടുകളിലേക്ക് ജനുവരി അവസാനത്തോടെ കണക്ഷൻ നൽകാനുള്ള ഒരുക്കങ്ങൾ നടക്കുന്നു. മാർച്ചിന് മുൻപ് 1000 കണക്ഷനുകളാണ് ലക്ഷ്യമിടുന്നത്.
കൂടാളിയിലെ ഏഴ് വീടുകളിൽ കണക്ഷൻ നൽകി. നവംബർ ഒന്നിനാണ് പദ്ധതിക്ക് തുടക്കം കുറിച്ചിരുന്നത്. സിറ്റി ഗ്യാസ് പദ്ധതി വിപുലീകരണത്തിന്റെ ഭാഗമായി കണ്ണൂർ കോർപ്പറേഷൻ പരിധിയിൽ എട്ട് വാർഡുകളിലായി 12,000 കണക്ഷനുകൾ നൽകാനുള്ള പ്രവർത്തനം നടക്കുകയാണ്.
15 മുതൽ 18 വരെയും 20, 22, 25 അടക്കം എട്ട് വാർഡുകളിലാണിത്. കണക്ഷൻ അനുമതിക്കായി കോർപ്പറേഷൻ അധികൃതരെ സമീപിച്ചിട്ടുണ്ട്. കൂടാളിയിലെ സ്റ്റേഷനിൽ നിന്നാണ് പൈപ്പ് ലൈൻ വഴി വാതകം എത്തിക്കുക. കണ്ണൂർ വരെ സ്റ്റീൽ പൈപ്പിടൽ പൂർത്തിയായി വരികയാണ്.
മട്ടന്നൂർ ഭാഗത്ത് ചാലോട് വരെയും വളപട്ടണം മുതൽ മാഹി വരെയും ഗ്യാസ് പൈപ്പ് ലൈൻ സ്ഥാപിക്കൽ തുടങ്ങി കഴിഞ്ഞു. കുറഞ്ഞ ചെലവിൽ വീടുകളിൽ നേരിട്ട് പാചക വാതകം എത്തിക്കാൻ ലക്ഷ്യമിട്ട് തുടങ്ങിയതാണ് സിറ്റി ഗ്യാസ് ലൈൻ പദ്ധതി. ഇന്ത്യൻ ഓയിൽ അദാനി ഗ്യാസ് പ്രൈവറ്റ് ലിമിറ്റഡ് കമ്പനിയാണ് നടത്തിപ്പുകാർ.
സുരക്ഷിതമായ പോളി എത്തിലീൻ പൈപ്പുകൾ ഉപയോഗിച്ചാണ് വീടുകളിൽ പാചകവാതകം എത്തിക്കുന്നത്. ഉപയോഗത്തിന് അനുസൃതമായി മീറ്റർ റീഡിങ് പ്രകാരമാണ് പ്രതിമാസ ബിൽ.