തിരുവനന്തപുരം: ഗുണ്ടകളെ അമര്ച്ച ചെയ്യാന് നഗരത്തില് ഓപ്പറേഷന് സുപ്പാരിയുമായി പൊലീസ്. സിറ്റി പൊലീസ് കമ്മീഷണർ സി.എച്ച് നാഗരാജുവിന്റെ നേതൃത്വത്തിലാണ് ഗുണ്ടകളെ പൂട്ടാന് നടപടി ഒരുങ്ങുന്നത്. ക്രിമിനല് സംഘങ്ങളുടെ ഫോട്ടോ ഉൾപ്പെടെ വ്യക്തിഗത വിവരങ്ങൾ തയ്യാറാക്കും.
കൊലപാതകം, കൊലപാതകശ്രമം, പിടിച്ചുപറി, ഭീഷണിപ്പെടുത്തൽ, മയക്കുമരുന്ന് കച്ചവടം, കൂലിത്തല്ല് എന്നീ കേസുകളിൽ ഉൾപ്പെട്ടവരുടെ വിവരങ്ങളാണ് പ്രധാനമായും ശേഖരിക്കുന്നത്. ഗുണ്ടകളുടെയും കൂട്ടാളികളുടെയും നീക്കങ്ങൾ നിരീക്ഷിക്കാനും സ്ഥിരം കുറ്റവാളികൾക്കെതിരെ കാപ്പ ചുമത്താനുമാണ് തീരുമാനം.
റിയല് എസ്റ്റേറ്റ് ഇടപാടുകള്ക്കായി ഗുണ്ടകളെ ഉപയോഗിക്കുന്ന ബിസിനസുകാര്ക്ക് എതിരെയും നടപടിയെടുക്കും. നഗരത്തിൽ തുടർച്ചയായ ഗുണ്ടാ ആക്രമണങ്ങളുടെ പശ്ചാത്തലത്തിലാണ് തീരുമാനം.