ന്യൂഡൽഹി: സുഡാനിലെ സംഘർഷത്തിന്റെ പശ്ചാത്തലത്തിൽ മലയാളികൾക്കായി കേരള ഹൗസിൽ 24 മണിക്കൂറും പ്രവർത്തിക്കുന്ന ഹെൽപ്പ് ഡെസ്ക് തുറന്നു. ബന്ധപ്പെടേണ്ട നമ്പർ: 011 23747079.
ആഭ്യന്തര യുദ്ധം രൂക്ഷമായ സുഡാനിൽ കുടുങ്ങി കിടക്കുന്നവരെ നാട്ടിൽ എത്തിക്കാനുള്ള രക്ഷാദൗത്യത്തിന് ഒരുങ്ങാൻ പ്രധാനമന്ത്രി നേരത്തെ നിർദ്ദേശം നൽകിയിരുന്നു. അടിയന്തര ഒഴിപ്പിക്കൽ വേണ്ടി വന്നാൽ അതിന് സജ്ജമായി ഇരിക്കാനാണ് നിർദേശം. രക്ഷാദൗത്യത്തിനുള്ള ആസൂത്രണം നടത്താനും പ്രധാനമന്ത്രി നരേന്ദ്ര മോദി ഉദ്യോഗസ്ഥർക്ക് നിർദേശം നൽകി.
സുഡാനിലെ സ്ഥിതിഗതികൾ വിലയിരുത്താൻ വിളിച്ച ഉന്നതതല യോഗത്തിലാണ് പ്രധാനമന്ത്രിയുടെ നിർദേശം. സുഡാനിൽ മലയാളി കൊല്ലപ്പെട്ടതിൽ പ്രധാനമന്ത്രി അനുശോചനം അറിയിച്ചു. 3000 ലധികം ഇന്ത്യാക്കാർ സുഡാനിൽ കുടുങ്ങി കിടക്കുന്നുണ്ടെന്ന് വിദേശകാര്യ മന്ത്രാലയം യോഗത്തിൽ അറിയിച്ചു.