.gif)
കേരള സംസ്ഥാന ചലച്ചിത്ര അക്കാദമി പട്ടികജാതി, പട്ടികവര്‍ഗ പിന്നാക്കക്ഷേമ വകുപ്പിന്റെ സഹകരണത്തോടെ ഗോത്രവിദ്യാര്‍ത്ഥികള്‍ക്കായി കണ്ണൂരില്‍ സംഘടിപ്പിക്കുന്ന അഞ്ചു ദിവസത്തെ ചലച്ചിത്രശില്‍പ്പശാലയ്ക്ക് നവംബർ 11 തുടക്കം. കണ്ണൂര്‍ പയ്യാമ്പലം പാം ഗ്രോവ് ഹെരിറ്റേജ് റിസോര്‍ട്ടില്‍ വൈകിട്ട് നാലു മണിക്ക് വി.ശിവദാസന്‍ എം.പി ക്യാമ്പിന്റെ ഉദ്ഘാടനം നിര്‍വഹിക്കും. രാമചന്ദ്രന്‍ കടന്നപ്പള്ളി എം.എല്‍.എ അധ്യക്ഷത വഹിക്കും. നടന്‍ മണിക്കുട്ടന്‍ ഡെലിഗേറ്റ് കിറ്റിന്റെ വിതരണോദ്ഘാടനം നിര്‍വഹിക്കും.നവംബര്‍ 11 മുതല്‍ 15 വരെ നടക്കുന്ന ശില്‍പ്പശാലയില്‍ പാലക്കാട് , മലപ്പുറം, വയനാട് കണ്ണൂര്‍, കാസര്‍കോഡ് ജില്ലകളില്‍ നിന്നായി 75 വിദ്യാര്‍ഥികളും 12 അധ്യാപകരും പങ്കെടുക്കും. ഛായാഗ്രാഹകന്‍ കെ.ജി ജയന്‍, നടി സജിത മഠത്തില്‍, ചലച്ചിത്രനിരൂപകന്‍ പി. പ്രേമചന്ദ്രന്‍, മേക്കപ്പ് മാന്‍ പട്ടണം റഷീദ്, നാടകനടനും സംവിധായകനും നാടക, സിനിമാനടനും അധ്യാപകനുമായ സജി തുളസീദാസ് എന്നിവര്‍ ക്‌ളാസുകള്‍ നയിക്കും. ചലച്ചിത്ര സംവിധായകന്‍ മനോജ് കാനയാണ് ക്യാമ്പ് ഡയറക്ടര്‍. മികച്ച സ്വഭാവനടനുള്ള കേരള സംസ്ഥാന ചലച്ചിത്ര അവാര്‍ഡ് ജേതാവായ പി.പി കുഞ്ഞികൃഷ്ണന്‍, നടന്‍ സന്തോഷ് കീഴാറ്റൂര്‍, 'കണ്ണൂര്‍ സ്‌ക്വാഡി'ലൂടെ ശ്രദ്ധേയയായ നടി അഫ്‌സാന ലക്ഷ്മി, നടനും സംവിധായകനുമായ രാജേഷ് മാധവന്‍ എന്നിവരുമായി കുട്ടികള്‍ സംവദിക്കും.ഗോത്രവര്‍ഗ വിദ്യാര്‍ത്ഥികള്‍ക്കായി ചലച്ചിത്ര അക്കാദമി ആവിഷ്‌കരിച്ച ചലച്ചിത്രപഠന, പരിശീലന പദ്ധതിയുടെ രണ്ടാംഘട്ടമാണിത്. സംസ്ഥാനത്തെ 22 മോഡല്‍ റെസിഡന്‍ഷ്യല്‍ സ്‌കൂളുകളില്‍നിന്ന് തെരഞ്ഞെടുക്കപ്പെട്ട 150 വിദ്യാര്‍ത്ഥികള്‍ക്കായി ചലച്ചിത്ര അക്കാദമി സംഘടിപ്പിക്കുന്ന രണ്ടു ക്യാമ്പുകളില്‍ രണ്ടാമത്തേത് ആണ് കണ്ണൂരിൽ നടക്കുന്നത്
