ഇൻസ്റ്റാഗ്രാമിനെയും ടിക് ടോക്കിനെയും കടത്തിവെട്ടി; ലോകത്ത് ഏറ്റവുമധികം ഡൗണ്‍ലോഡ് ചെയ്യുന്ന ആപ്പായി ചാറ്റ് ജിപിടി

സോഷ്യൽ മീഡിയ ഭീമന്മാരായ ഇന്‍സ്റ്റഗ്രാമിനെയും ടിക് ടോകിനെയും പിന്തള്ളി മാർച്ചിൽ ലോകത്ത് ഏറ്റവുമധികം ഡൗൺലോഡ് ചെയ്യപ്പെട്ട ആപ്പ് എന്ന പദവി സ്വന്തമാക്കി ഓപ്പണ്‍ എഐയുടെ ചാറ്റ് ജിപിടി. ഓപ്പൺഎഐ അടുത്തിടെ അവതരിപ്പിച്ച പുതിയ ഇമേജ് ജനറേഷൻ ടൂളുമായി യോജിച്ചാണ് ഡൗൺലോഡുകളുടെ ഈ കുതിച്ചുചാട്ടം. ഗിബ്ലി ശൈലിയിലുള്ള സ്റ്റുഡിയോ ആർട്ട് സൃഷ്ടിക്കുന്ന ഉപയോക്താക്കളാണ് ചാറ്റ് ജിപിടിയ്ക്ക് ഇങ്ങനെയൊരു പദവി നേടിക്കൊടുക്കാൻ മുൻകൈ എടുത്തത്. ആപ്പ് ഫിഗേഴ്‌സ് എന്ന അനലറ്റിക്‌സ് കമ്പനിയാണ് ഇതുസംബന്ധിച്ച കണക്കു പുറത്തുവിട്ടത്. മാര്‍ച്ചിലെ 4.6 കോടി ഡൗണ്‍ലോഡില്‍ 1.3 കോടി ആപ്പിള്‍ ഫോണുകളിലായിരുന്നു. 3.3 കോടി ആന്‍ഡ്രോയിഡ് ഫോണുകളിലും. ഇന്‍സ്റ്റഗ്രാമിനും ഇതിനടുത്തുതന്നെ ഡൗണ്‍ലോഡ് ഉണ്ടായി. ഐഫോണുകളില്‍ 50 ലക്ഷവും ആന്‍ഡ്രോയിഡ് ഫോണുകളില്‍ 4.1 കോടിയുമായി ഇന്‍സ്റ്റഗ്രാം ഡൗണ്‍ലോഡ്. ടിക് ടോകിന് 4.5 കോടി ഡൗണ്‍ലോഡ് ലഭിച്ചു. ഐഫോണില്‍ 80 ലക്ഷം. ആന്‍ഡ്രോയിഡില്‍ 3.7 കോടി. ഫെബ്രുവരി മുതൽ മാർച്ച് വരെയുള്ള കാലയളവിൽ ആപ്പ് ഡൗൺലോഡുകളിൽ 28% വർദ്ധനവ് രേഖപ്പെടുത്തി, 2024 ലെ ആദ്യ പാദത്തെ 2025 ലെ ഇതേ കാലയളവുമായി താരതമ്യപ്പെടുത്തുമ്പോൾ 148% അമ്പരപ്പിക്കുന്ന വർദ്ധനവും ഉണ്ടായി. ഫീച്ചർ ആരംഭിച്ചതിനുശേഷം 130 ദശലക്ഷത്തിലധികം ഉപയോക്താക്കൾ ഒരുമിച്ച് 700 ദശലക്ഷത്തിലധികം ചിത്രങ്ങൾ ആണ് നിർമിച്ചത്- ഫീച്ചർ എത്രത്തോളം ‘വൈറൽ’ ആയിപ്പോയി എന്ന് കാണിക്കുന്ന കണക്കാണിത്.