ആഗോള സൗന്ദര്യ മത്സരത്തില്‍ കിരീടം നേടി മലപ്പുറംകാരി

മുംബൈയില്‍ നടന്ന 32-ാം ആഗോള സൗന്ദര്യ മത്സരത്തില്‍ കിരീടം നേടി അബുദാബിയില്‍ ജനിച്ചു വളര്‍ന്ന സുകന്യ സുധാകരന്‍. മുംബൈയിലെ ദി ലലിത് ഹോട്ടലില്‍ നടന്ന മിസ് ഇന്ത്യ വേള്‍ഡ് വൈഡ് മത്സരത്തിലാണ് കിരീടം നേടിയത്. ന്യൂയോര്‍ക്കിലെ ഇന്ത്യ ഫെസ്റ്റിവല്‍ കമ്മിറ്റി (ഐ എഫ് സി) ആണ് മിസ് ഇന്ത്യ വേള്‍ഡ് വൈഡ് സംഘടിപ്പിച്ചത്. ലോകത്തിന്റെ വിവിധ ഭാഗങ്ങളില്‍ നിന്ന് ഇന്ത്യന്‍ വംശജരായ 38 മത്സരാര്‍ഥികളാണ് പങ്കെടുത്തത്.

എം ബി എ ബിരുദധാരിയായ സുകന്യ സുധാകരന്‍ മോഡലും നര്‍ത്തകിയും തിയേറ്റര്‍ ആര്‍ട്ടിസ്റ്റുമാണ്. പ്രമുഖ ഫാഷന്‍ ഡിസൈനര്‍മാരോടൊപ്പം അനവധി തവണ പ്രവര്‍ത്തിച്ചിട്ടുഉള സുകന്യ മിഡില്‍ ഈസ്റ്റിലെ ഏറ്റവും സ്വാധീനമുള്ള 50 സ്ത്രീകളുടെ പട്ടികയിലും ഇടം പിടിച്ചിട്ടുണ്ട്. ആദ്യ മിസ് ഇന്ത്യ വേള്‍ഡ് വൈഡിന് ശേഷം ഈ ബഹുമതി നേടുന്ന ആദ്യ മലയാളി കൂടിയാണ് സുകന്യ. മലപ്പുറത്തുകാരിയായ സുകന്യ ഇപ്പോള്‍ താമസിക്കുന്നത് കോഴിക്കോട് ആണ്. അലിയന്‍സ് (ടെക്നോപാര്‍ക്ക്) ല്‍ എച്ച് ആര്‍ എക്‌സിക്യൂട്ടീവായി ജോലി ചെയ്യുന്നു.

പഠന കാലഘട്ടം മുതല്‍ മോഡലിങ്ങില്‍ അഭിരുചി ഉണ്ടായിരുന്നു. ജോലി ലഭിച്ചപ്പോഴും അത് തുടരുകയാണ്. 2025ലെ മിസ് ഇന്ത്യ യു എ ഇയും 2014ലെ മിസ് കേരള മിസ് ഫോട്ടോജനിക്കും ആണ്. സുകന്യയുടെ എല്ലാ ആഗ്രഹങ്ങള്‍ക്കും പിന്തുണയായി അച്ഛന്‍ സുധാകരനും അമ്മ അനിതയും സഹോദരി മാനസയും സഹോദരി ഭര്‍ത്താവ് അഡ്വ. ഗോവിന്ദും ഒപ്പമുണ്ട്. അച്ഛന്‍ അബുദാബി വിദ്യാഭ്യാസ മന്ത്രിയുടെ പി ആര്‍ ഒ ആയാണ് വിരമിച്ചത്.