ശബരിമല തീർത്ഥാടകർ സഞ്ചരിച്ച വാഹനം നിയന്ത്രണം വിട്ടെത്തി റോഡ് സൈഡിൽ നിർത്തിയിട്ട ലോറിയിൽ ഇടിച്ച്‌ അപകടം; കർണാടകയിൽ ഏഴ് വയസ്സുകാരി ഉൾപ്പെടെ നാല് പേര്‍ക്ക് ദാരുണാന്ത്യം

ബെംഗളൂരു: കർണാടകയിൽ ശബരിമല തീർത്ഥാടകർ സഞ്ചരിച്ച വാഹനം അപകടത്തിൽപ്പെട്ട് നാല് മരണം. ഏഴ് വയസ്സുകാരി ഉൾപ്പെടെയുള്ളവരാണ് അപകടത്തിൽ മരിച്ചത്. കർണാടകയിലെ കൊപ്പളയിൽ വച്ചാണ് സംഭവം. ഇവർ സഞ്ചരിച്ച വാഹനം നിയന്ത്രണം വിട്ടെത്തി റോഡ് സൈഡിൽ നിർത്തിയിട്ട ലോറിയിൽ ഇടിക്കുകയായിരുന്നു. അപകടത്തിൽ ഏഴ് പേർക്ക് പരിക്കേറ്റു. ഇതിൽ ചിലരുടെ പരിക്ക് ഗുരുതരമാണെന്നാണ് വിവരം. ശബരിമല ദർശനം കഴിഞ്ഞ് മടങ്ങുമ്പോൾ ആയിരുന്നു അപകടം. സംഭവത്തിൽ പൊലീസ് തുടർ നടപടി സ്വീകരിച്ച് വരികയാണ്.മറ്റൊരു സംഭവത്തിൽ ഇന്നലെ ഉച്ചയ്ക്ക് കേരളത്തിലെ പുനലൂർ-മൂവാറ്റുപുഴ സംസ്ഥാന പാതയിൽ റാന്നിക്ക് സമീപമുള്ള മന്ദിരം പടിയിൽ കാറും മിനിവാനും കൂട്ടിയിടിച്ചുണ്ടായ അപകടത്തിൽ രണ്ട് ശബരിമല തീർത്ഥാടകർ മരിക്കുകയും ആറ് പേർക്ക് പരിക്കേൽക്കുകയും ചെയ്തു. ശബരിമലയിൽ നിന്ന് മടങ്ങുകയായിരുന്ന കർണാടകയിൽ നിന്നുള്ള ഭക്തരെ വഹിച്ചുകൊണ്ടുള്ള ഒരു കാർ തമിഴ്‌നാട്ടിൽ നിന്നുള്ള തീർത്ഥാടകരെ വഹിച്ചുകൊണ്ടുള്ള ഒരു മിനിവാനിൽ ഇടിച്ചാണ് അപകടമുണ്ടായതെന്ന് പോലീസ് പറഞ്ഞു. ഈ അപകടത്തെ തുടർന്ന് ഒരു മണിക്കൂറോളം ദേശീയപാതയിൽ ഗതാഗതം തടസ്സപ്പെട്ടു. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം തുടരുകയാണ്