ഇരിട്ടിയിൽ കസ്റ്റമറെ കടയിലേക്ക് വിളിച്ചു കയറ്റുന്നതിലെ തർക്കം ടെക്സ്റ്റൈൽസ് ജീവനക്കാരന് വെട്ടേറ്റു

ഇരിട്ടി: കസ്റ്റമറെ കടയിലേക്ക് വിളിച്ചുകയറ്റുന്നതിലെ തർക്കം ഇരിട്ടിയിൽ ടെക്സ്റ്റൈൽ തൊഴിലാളിക്ക് വെട്ടേറ്റു. ഇരിട്ടി പുതിയ ബസ്‌സ്റ്റാൻഡിന് സമീപത്തെ അടുത്തടുത്തുള്ള രണ്ട് കടകളിലേക്ക് ആളുകളെ വിളിച്ചുകയറ്റുന്നതിൽ പരസ്പരം ഉണ്ടായ തർക്കമാണ് കൈയാങ്കളിയിലേക്കും ആയുധം എടുത്തുള്ള അക്രമണത്തിലേക്കും മാറിയത്. ഇന്നലെ വൈകുന്നേരം 5.30 ഓടെയായിരുന്നു സംഭവം. ഫാഷൻ വേൾഡ് കടയിലെ ജീവനക്കാരനായ ഷാജിക്കാണ് (52) കൈയിൽ വെട്ടേറ്റത്. സമീപത്തെ ഫാമിലി ഫാഷനിലെ ജീവനക്കാരൻ അഷ്‌കറാണ് ആക്രമണം നടത്തിയതെന്നാണ് പരാതി. കടകൾക്ക് മുന്നിൽ വഴിയോര കച്ചവടം നടത്തുന്നവർ വില്പനക്ക് വച്ചിരുന്ന കത്തിയെടുത്താണ് പ്രതി ആക്രമണം നടത്തിയത്. കൈക്ക് പരിക്കേറ്റ ഷാജിയെ തലശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ ഇരിട്ടി പോലീസ് കേസ് രജിസ്റ്റർ ചെയ്തു.