തിരുവനന്തപുരം-മംഗളൂരു റൂട്ടിൽ ഈ വർഷം വന്ദേ സ്ലീപ്പർ ഓടിയേക്കും

രാജ്യത്തെ ആദ്യ വന്ദേ സ്ലീപ്പർ തീവണ്ടി ഉത്തര റെയിൽവേയ്ക്ക്. ഈ വർഷം പുറത്തിറങ്ങുന്ന മറ്റ്‌ ഒൻപത് വന്ദേ സ്ലീപ്പറുകളിൽ ഒന്ന് കേരളത്തിന് ലഭിക്കും. ദക്ഷിണ റെയിൽവേയ്ക്ക് അനുവദിക്കുന്ന 16 കോച്ച് വണ്ടിയുടെ ആദ്യ പരിഗണന കേരളത്തിനാണ്. തിരുവനന്തപുരം-മംഗളൂരു റൂട്ടിനാണ് മുൻഗണന .മറ്റ് സോണുകളെ ബന്ധിപ്പിച്ചുള്ള യാത്രയിൽ കന്യാകുമാരി-ശ്രീനഗർ (കൊങ്കൺ വഴി), തിരുവനന്തപുരം- ബെംഗളൂരു റൂട്ടിന്റെ സാധ്യതയുമുണ്ട്. ചെന്നൈ ഇന്റഗ്രൽ കോച്ച് ഫാക്ടറിയാണ് വന്ദേ സ്ലീപ്പറിന്റെ രൂപകൽപന. ഭാരത് എർത്ത് മൂവേഴ്സ് ലിമിറ്റഡ് ആണ് നിർമിച്ചത്. ശീതീകരിച്ച വണ്ടിയിൽ 1,128 യാത്രക്കാരെ ഉൾക്കൊള്ളും. നിലവിൽ വന്ദേഭാരതിന്റെ (എട്ട്‌, 16, 20 ചെയർ കാർ) പദ്ധതി ചെന്നൈ ഐ സി എഫിൽ ഊർജിതമായി നടക്കുന്നുണ്ട്. ഈ പദ്ധതിയിൽ നിന്നുള്ള 16 കോച്ചുള്ള (കാർ) 10 റേക്ക് എടുത്താണ് സ്ലീപ്പറാക്കി മാറ്റുന്നത്. 10 വന്ദേ സ്ലീപ്പറിന് പുറമേ 50 എണ്ണം നിർമിക്കാനുള്ള ഓർഡർ ചെന്നൈ ഐ സി എഫിന് ലഭിച്ചു. 2026-27 ലാണ് ഇവ പുറത്തിറങ്ങുക.സുഖകരമായ ബെർത്തുകൾ. ഉൾഭാഗത്തിന്റെ അത്യാധുനിക രൂപകല്പന, വായനക്ക് വേണ്ടിയുള്ള പ്രത്യേക പ്രകാശ സംവിധാനം. ജി പി എസ് അധിഷ്ഠിത എൽ ഇ ഡി ഡിസ്‌പ്ലേ, പ്രത്യേക പരിഗണന ഉള്ളവർക്കുള്ള ബെർത്തുകളും ശൗചാലയങ്ങളും, മോഡുലാർ പാൻട്രി, ഓട്ടോമാറ്റിക് വാതിലുകൾ, കവച് ഉൾപ്പെടെ സുരക്ഷ സംവിധാനം എന്നീ പ്രത്യേകതകളുണ്ട്.

WE ONE KERALA -NM