.jpg)
ജില്ലയിലെ റൂട്ട് ബസുകളില്‍ ഓഡിയോ, വീഡിയോ സംവിധാനങ്ങള്‍ ഉണ്ടെങ്കില്‍ രണ്ട് ദിവസത്തിനുള്ളില്‍ പൂര്‍ണമായി അഴിച്ചുമാറ്റേണ്ടതാണെന്ന് കണ്ണൂര്‍ ആര്‍ടിഒ (എന്‍ഫോഴ്സ്മെന്റ്) അറിയിച്ചു. അമിത ശബ്ദമുണ്ടാക്കുന്ന ഹോണുകളും ഒഴിവാക്കണം. റൂട്ട് ബസുകളില്‍ ഓഡിയോ, വീഡിയോ സംവിധാനങ്ങള്‍ പ്രവര്‍ത്തിപ്പിക്കുന്നത് നിയമ വിരുദ്ധമാണെന്നിരിക്കെ ജില്ലയിലെ പല ബസുകളിലും ഇവ വെച്ചുപിടിപ്പിച്ച് അതീവ ഉച്ചത്തില്‍ പാട്ടുവെക്കുന്നതായും, അതിന്റെ ശബ്ദം കുറക്കാന്‍ പറഞ്ഞാല്‍ പോലും കുറക്കുന്നില്ലെന്നും പരാതിയുണ്ട്. ഇത് വഴക്കിലേക്ക് നയിക്കുന്നതായും ഇതിന്റെ പേരില്‍ യാത്രക്കാരനെ ബസില്‍നിന്ന് ഇറക്കി വിട്ടതായും പരാതിയില്‍ പറയുന്നു. സീറ്റിന്റെ അടിയില്‍ സ്പീക്കര്‍ ബോക്സ് വച്ചിരിക്കുന്നത് കൊണ്ട് കാല്‍ നീട്ടിവച്ചു ഇരിക്കാന്‍ പറ്റുന്നില്ലെന്നും പരാതിയുണ്ട്. പരിശോധനകളിലോ പരാതിയിലോ ഇത്തരത്തില്‍ നിയമലംഘനം കണ്ടെത്തിയാല്‍ 10,000 രൂപ വരെയുള്ള ഉയര്‍ന്ന പിഴയും വാഹനത്തിന്റെ പെര്‍മിറ്റ്, ഫിറ്റ്നസ് റദ്ദാക്കുന്നതുള്‍പ്പടെയുള്ള നടപടികളും കൈക്കൊള്ളുമെന്നും ആര്‍ടിഒ അറിയിച്ചു. അമിത ശബ്ദമുള്ള ഹോണുകള്‍ ഉപയോഗിക്കുന്നതിന് എതിരെയും പരാതിയുണ്ട്. കണ്ണൂര്‍ ജില്ലയിലെ ഓട്ടോറിക്ഷകളില്‍ മീറ്റര്‍ ഫിറ്റ് ചെയ്ത് പ്രവര്‍ത്തിപ്പിക്കുന്നില്ലെന്നും പെര്‍മിറ്റിന് അനുസൃതമായല്ല ഓടുന്നതെന്നും പരാതി ലഭ്യമായിട്ടുണ്ട്. ഇതിന്റെ അടിസ്ഥാനത്തിലും വരും ദിവസങ്ങളില്‍ കര്‍ശന പരിശോധന ഉണ്ടാകുമെന്നും അറിയിച്ചു.
Post a Comment