ನರೇಂದ್ರ ಮೋದಿ - ಎಲಾನ್‌ ಮಸ್ಕ್‌ ಮಹತ್ವದ ಮಾತುಕತೆ, ಭಾರತಕ್ಕೆ ಯಾವಾಗ ಬರಲಿದೆ ಟೆಸ್ಲಾ ಕಾರು?

ಅಮೆರಿಕ ಸರಕಾರದಲ್ಲಿ ಕಾರ್ಯದಕ್ಷತೆ ಇಲಾಖೆ ಮುಖ್ಯಸ್ಥರಾಗಿರುವ ಮಸ್ಕ್‌ ಅವರೊಂದಿಗೆ ದೂರವಾಣಿ ಮೂಲಕ ಮಾತುಕತೆ ನಡೆಸಿದ ಮೋದಿ ಅವರು, ಹೊಸ ತಂತ್ರಜ್ಞಾನ ಅಭಿವೃದ್ಧಿ, ನಾವೀನ್ಯ ಕ್ಷೇತ್ರಗಳಲ್ಲಿ ಪರಸ್ಪರ ಸಹಯೋಗ ಸ್ಥಾಪಿಸುವ ಕುರಿತು ಸಮಾಲೋಚಿಸಿದರು. ಭಾರತಕ್ಕೆ ಕಾಲಿಡಲು ಟೆಸ್ಲಾ ಸಜ್ಜಾಗಿರುವ ಹಂತದಲ್ಲಿ ಮಸ್ಕ್‌ ಹಾಗೂ ಮೋದಿ ನಡುವೆ ನಡೆದಿರುವ ಮಾತುಕತೆ ಮಹತ್ವ ಪಡೆದುಕೊಂಡಿದೆ. ಮಸ್ಕ್‌ ಜತೆಗಿನ ಮಾತುಕತೆ ಕುರಿತಂತೆ 'ಎಕ್ಸ್‌'ನಲ್ಲಿ ಪೋಸ್ಟ್‌ ಮಾಡಿರುವ ಪ್ರಧಾನಿ ಮೋದಿ ಅವರು, ''ಕಳೆದ ಫೆಬ್ರವರಿಯಲ್ಲಿ ಅಮೆರಿಕಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಚರ್ಚಿಸಲಾದ ವಿಷಯಗಳ ಬಗ್ಗೆ ಮಾತುಕತೆ ನಡೆಸಲಾಯಿತು. ಉದ್ದೇಶಿತ ಯೋಜನೆಗಳನ್ನು ಕಾರ್ಯಗತಗೊಳಿಸಲು ಚರ್ಚಿಸಲಾಯಿತು. ಭಾರತದಲ್ಲಿ ಟೆಸ್ಲಾ ಉದ್ಯಮ ಆರಂಭ ವಿಚಾರವೂ ಸೇರಿದಂತೆ ತಂತ್ರಜ್ಞಾನ ಅಭಿವೃದ್ಧಿ, ನವೀನ ತಂತ್ರಜ್ಞಾನ (ಎಐ) ಬೆಳವಣಿಗೆ, ಬಾಹ್ಯಾಕಾಶ ಕ್ಷೇತ್ರದಲ್ಲಿ ಸಂಶೋಧನೆ, ಹೊಸ ಹೊಸ ಕ್ಷೇತ್ರಗಳಲ್ಲಿ ಅಮೆರಿಕ ಹಾಗೂ ಭಾರತ ನಡುವೆ ಸಹಯೋಗ ರೂಪಿಸುವ ಕುರಿತಂತೆ ಮಾತುಕತೆ ನಡೆಸಲಾಗಿದೆ,'' ಎಂದು ಹೇಳಿದ್ದಾರೆ. ಮಸ್ಕ್‌ ಜತೆಗಿನ ಮಾತುಕತೆ ವೇಳೆ ''ತಂತ್ರಜ್ಞಾನ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಅಮೆರಿಕ ಜತೆಗಿನ ಪಾಲುದಾರಿಕೆ ಮುಂದುವರಿಸಲು ಭಾರತ ಬದ್ಧವಾಗಿದೆ,'' ಎಂದು ಮೋದಿ ಭರವಸೆ ನೀಡಿದ್ದಾರೆ. 

ಶೀಘ್ರವೇ ಭಾರತದಲ್ಲಿ ಟೆಸ್ಲಾ ಕಾರು

ಎಲಾನ್‌ ಮಸ್ಕ್‌ ಮಾಲೀಕತ್ವದ ಟೆಸ್ಲಾ ಕಂಪನಿಯ ಕಾರುಗಳು ಭಾರತಕ್ಕೆ ದಾಂಗುಡಿ ಇಡಲು ಸಜ್ಜಾಗಿವೆ. ಬ್ಲೂಮ್‌ಬರ್ಗ್‌ ವರದಿ ಪ್ರಕಾರ ಮೂರನೇ ತ್ರೈಮಾಸಿಕದ ವೇಳೆಗೆ ಬೆಂಗಳೂರು, ಮುಂಬಯಿ, ದಿಲ್ಲಿಯಲ್ಲಿ ಕಾರು ಮಾರಾಟ ಆರಂಭಿಸಲು ಟೆಸ್ಲಾ ನಿರ್ಧರಿಸಿದೆ. ಉದ್ದೇಶಿತ ಕಾರ್ಯಯೋಜನೆಗೆ ಅಮೆರಿಕದಿಂದ ಮುಂಬಯಿ ಬಂದರಿಗೆ ಕಾರುಗಳನ್ನು ರವಾನಿಸಲು ಮುಂದಾಗಿದೆ. 

ಅಮೆರಿಕದಿಂದ ಭಾರತಕ್ಕೆ ಹತ್ತಿ ರಫ್ತು ಏರಿಕೆ

ಹೊಸದಿಲ್ಲಿ: ಚೀನಾದ ನಂತರ ಹತ್ತಿ ಉತ್ಪಾದನೆಯಲ್ಲಿ ಎರಡನೇ ಸ್ಥಾನ ಗಳಿಸಿರುವ ಭಾರತ ಈಗ ಹತ್ತಿ ಕೊರತೆಯನ್ನು ಎದುರಿಸುತ್ತಿದೆ. ಹವಾಮಾನ ವೈಪರೀತ್ಯದಿಂದ ಇಳುವರಿ ಕುಸಿತವಾಗಿದೆ. ಹೀಗಾಗಿ ಆಮದಿನ ಮೇಲೆ ಅವಲಂಬಿಸುವಂತಾಗಿದೆ. ಈ ವರ್ಷ ಆಮದು ಪ್ರಮಾಣ ದ್ವಿಗುಣಗೊಂಡಿದೆ ಎಂದು ಕಾಟನ್‌ ಆಸೋಸಿಯೇಷನ್‌ ಆಫ್‌ ಇಂಡಿಯಾ ಹೇಳಿದೆ. ಸುಂಕ ಸಮರ ಸಾರಿ ಇಡೀ ಜಗತ್ತನ್ನು ಆತಂಕಕ್ಕೆ ದೂಡಿರುವ ಅಮೆರಿಕ ಇದೀಗ ಭಾರತಕ್ಕೆ ಕಡಿಮೆ ಬೆಲೆಯಲ್ಲಿ ಕಾಟನ್‌ ಎಕ್ಸ್‌ಪೋರ್ಟ್‌ ಮಾಡಿದೆ. ದೊಡ್ಡಣ್ಣನಿಂದ ಬರುವ ಎಲ್ಲ ಉತ್ಪನ್ನಗಳಿಗೆ ಚೀನಾ ಶೇ. 124ರಷ್ಟು ತೆರಿಗೆ ಘೋಷಣೆ ಮಾಡಿದೆ. ಅಲ್ಲಿ ಬಾಗಿಲು ಬಂದ್‌ ಆಗಿರುವುದರಿಂದ ಅಮೆರಿಕದಿಂದ ಹತ್ತಿ ನೇರವಾಗಿ ಭಾರತ ಮುಟ್ಟುತ್ತಿದೆ.

ಅಮೆರಿಕದ ಕೃಷಿ ಇಲಾಖೆ ನೀಡಿರುವ ಅಂಕಿ ಅಂಶಗಳ ಪ್ರಕಾರ ಫೆಬ್ರವರಿಯಿಂದ ಏಪ್ರಿಲ್‌ ತನಕ ಭಾರತಕ್ಕೆ ರಫ್ತಾದ ಹತ್ತಿ ಅಂಡಿಗೆ (ಬೇಲ್‌) 1,55,260ಕ್ಕೆ ಏರಿದೆ. ಕಳೆದ ವರ್ಷ ನಮಗೆ ಬಂದ ಅಂಡಿಗೆಗಳ ಪ್ರಮಾಣ 25,901 ರಷ್ಟಿತ್ತು (ಒಂದು ಬೇಲ್‌ಗೆ 170 ಕೆ.ಜಿ ಇರುತ್ತದೆ). ಹತ್ತಿ ಸುಗ್ಗಿ ಋುತು ಗ್ರಾಮೀಣ ಜಾರ್ಜಿಯಾದಲ್ಲಿ ಮುಖ್ಯ ಸಂಗತಿಯಾಗಿದೆ. ಯಾವ ರಾಜಕಾರಣಿಯೂ ಇದನ್ನು ನಿರ್ಲಕ್ಷಿಸುವಂತೆಯೇ ಇಲ್ಲ ಎನ್ನುವಷ್ಟರ ಮಟ್ಟಿಗೆ ಹತ್ತಿ ಪ್ರಾಧಾನ್ಯತೆಯನ್ನು ಪಡೆದುಕೊಂಡಿದೆ.

ಜಾಗತಿಕ ಸುಂಕ ಸಂಘರ್ಷ, ಅಮೆರಿಕದಲ್ಲಿ ಬೆಲೆಗಳ ಕುಸಿತ ಮತ್ತು ದಕ್ಷಿಣ ಏಷ್ಯಾದ ದೇಶದಲ್ಲಿ ಹೆಚ್ಚುತ್ತಿರುವ ಬೇಡಿಕೆಯಿಂದಾಗಿ ಕಳೆದ ಕೆಲವು ತಿಂಗಳುಗಳಲ್ಲಿ ಭಾರತಕ್ಕೆ ಅಮೆರಿಕ ಹತ್ತಿ ರಫ್ತು ಹೆಚ್ಚಾಗಿದೆ ಎಂದು ಉದ್ಯಮ ತಜ್ಞರು ಹೇಳಿದ್ದಾರೆ.