ಕಾಫಿ, ಕಾಳುಮೆಣಸು ದರ ಗಗನಕ್ಕೇರಿದ ಎಫೆಕ್ಟ್: ಚಿಕ್ಕಮಗಳೂರಲ್ಲಿ 6 ತಿಂಗಳಲ್ಲಿ 5,777 ಕಾರುಗಳು ರಸ್ತೆಗೆ!

ಕಾಫಿ ಬೆಲೆ ಹೆಚ್ಚಾದ ಕೇವಲ 6 ತಿಂಗಳಲ್ಲಿಯೇ ಕಾಫಿನಾಡಿನಲ್ಲಿ ಬರೋಬ್ಬರಿ 5,777 ವಿವಿಧ ಮಾದರಿಯ ವಾಹನಗಳು ರಸ್ತೆಗಿಳಿದಿವೆ. ಕ್ವಿಂಟಲ್‌ ಕಾಳುಮೆಣಸು ದರ 60-75 ಸಾವಿರ ರೂ. ಗಡಿಯಲ್ಲಿದೆ. ಕಳೆದ ವರ್ಷವೂ ಇದೇ ಧಾರಣೆ ಇತ್ತು. ಆದರೆ, ಕಾಫಿಗೆ ಈ ಬಾರಿ ಕಂಡು ಕೇಳರಿಯದ, ಬೆಳೆಗಾರರು ಸಹ ಊಹಿಸಿರದ ಧಾರಣೆ ಬಂದಿದೆ.

ಕಳೆದ ವರ್ಷ 50 ಕೆಜಿ ಕಾಫಿ ಚೀಲದ ಧಾರಣೆ 15 ಸಾವಿರ ರೂ. ಗಡಿ ದಾಟಿರಲಿಲ್ಲ. ಈ ಬಾರಿ 17 ಸಾವಿರದಿಂದ ಆರಂಭವಾಗಿ 29 ಸಾವಿರದವರೆಗೆ ಬೆಲೆ ಏರಿಕೆಯಾಗಿದೆ. ಫಸಲಿನ ಬೆಲೆ ಗಗನಕ್ಕೇರಿದೆ ಎಂದರೆ ಸುಮ್ಮನಿರಲಾಗುತ್ತದೆಯೇ? ಐಷಾರಾಮಿ ಜೀವನಕ್ಕೆ ಹಲವು ದಾರಿ ತೆರೆದುಕೊಳ್ಳುತ್ತವೆ. ಇಲ್ಲಿಯವರೆಗೆ ಕಾಫಿ ಇಳುವರಿ ಕಡಿಮೆ, ಇಳುವರಿಗೆ ತಕ್ಕಂತೆ ಬೆಲೆ ಇಲ್ಲ ಎಂದು ಬೆಳೆಗಾರರು ಕೊರಗುತ್ತಿದ್ದರು. ಈಗ ಉತ್ತಮ ಧಾರಣೆ ಬಂದಿರುವುದರಿಂದ ಅವರ ಕೃಷಿ ಅಗತ್ಯತೆಗಳನ್ನು ಪೂರೈಸಿಕೊಂಡು ಕೆಲವರು ಐಷಾರಾಮಿ ಜೀವನಕ್ಕೆ ಮುಂದಾಗಿರುವುದು ಅವರ ಕಾರು ಖರೀದಿಯಲ್ಲೇ ತಿಳಿದು ಬರುತ್ತದೆ.

1,364 ಕಾರುಗಳು ನೋಂದಣಿ

ಕಾಫಿ ಧಾರಣೆ ಹೆಚ್ಚಾಗಿ 6 ತಿಂಗಳಾಗಿದೆ. ಅಲ್ಲಿಂದ ಇಲ್ಲಿಯವರೆಗೆ ಮಲೆನಾಡಿನಲ್ಲಿ 32.43 ಲಕ್ಷ ರೂ. ಮೌಲ್ಯದ 1 ಬಿಎಂಡಬ್ಲ್ಯೂ ಕಾರು, 73.29 ಲಕ್ಷ ರೂ. ಮೌಲ್ಯದ 3 ಬೆಂಜ್‌ ಕಾರುಗಳು, 14 ರಿಂದ 25 ಲಕ್ಷ ರೂ. ವರೆಗಿನ 40 ಮಹೀಂದ್ರ ಎಕ್ಸ್‌ಯುವಿ-700 ಕಾರುಗಳು, 13.65 ಲಕ್ಷ ರೂ.ಬೆಳೆಬಾಳುವ 35 ಸ್ಕೋಡಾ ಕಾರುಗಳು, 24.65 ಲಕ್ಷ ರೂ. ಬೆಲೆ-ಬಾಳುವ 43 ಇನ್ನೋವಾ ಸೇರಿ ಒಟ್ಟು 1,364 ವಿವಿಧ ಮಾದರಿಯ ಕಾರುಗಳು ಚಿಕ್ಕಮಗಳೂರು ಪ್ರಾದೇಶಿಕ ಸಾರಿಗೆ ಕಚೇರಿಯಲ್ಲಿ ನೋಂದಣಿಯಾಗಿವೆ. ಕಾರುಗಳ ಸಂಖ್ಯೆ ಇಷ್ಟಾದರೆ ಮೋಟರ್‌ ಬೈಕ್‌ 3,330, ಮೊಪೆಡ್‌ 50, ಟ್ರ್ಯಾಕ್ಟರ್‌ 224, ಗೂಡ್ಸ್‌ ಕ್ಯಾರಿಯರ್‌ 422, ವಾಣಿಜ್ಯ ಉದ್ದೇಶದ ಟ್ರ್ಯಾಕ್ಟರ್‌ಗಳು 35, ಕ್ಯಾಬ್‌ 79, ಬಸ್‌ 6, ತ್ರಿಚಕ್ರ ಪ್ಯಾಸೆಂಜರ್‌ 153, ತ್ರಿ ವ್ಹೀಲರ್‌ ಗೂಡ್ಸ್‌ 23, ಬಾಡಿಗೆ ಬೈಕ್‌ಗಳು 10, ಜೆಸಿಬಿ 14 ಹೀಗೆ ಒಟ್ಟು 6 ತಿಂಗಳಲ್ಲಿ5,777 ವಾಹನಗಳು ಜಿಲ್ಲೆಯಲ್ಲಿ ನೋಂದಣಿಯಾಗಿವೆ. ಇನ್ನು ಇಡೀ ವರ್ಷದ ವಾಹನಗಳ ಲೆಕ್ಕ ಹಾಕಿದರೆ ಅವುಗಳ ಸಂಖ್ಯೆ 13 ಸಾವಿರದ ಗಡಿ ದಾಟುತ್ತದೆ. ಅದರಲ್ಲಿ ಕಾರುಗಳ ಸಂಖ್ಯೆಯೇ 3 ಸಾವಿರಕ್ಕೂ ಅಧಿಕವಾಗಿರುವುದು ಗಮನಾರ್ಹ.