വാട്ട്‌സ്ആപ്പിൽ നിന്ന് ചാറ്റ്ജിപിടി ഔട്ട് ? 2026 ജനുവരി മുതൽ പ്രധാന എഐ ചാറ്റ്ബോട്ടുകൾക്ക് വിലക്ക്

മെറ്റാ ഉടമസ്ഥതയിലുള്ള വാട്ട്‌സ്ആപ്പ്, തങ്ങളുടെ ബിസിനസ് API പോളിസിയിൽ സുപ്രധാനമായ മാറ്റങ്ങൾ വരുത്തിയിരിക്കുന്നു. 2026 ജനുവരി 15 മുതൽ, പ്ലാറ്റ്‌ഫോമിൽ ജനറൽ പർപ്പസ് ചാറ്റ്‌ബോട്ടുകൾ ഉപയോഗിക്കുന്നത് നിരോധിക്കും. OpenAI, Perplexity, Luzia, Poke തുടങ്ങിയ കമ്പനികളുടെ AI അസിസ്റ്റന്റുകൾക്ക് ഈ പുതിയ നീക്കം തിരിച്ചടിയാകും.

പുതുക്കിയ നിബന്ധനകൾ അനുസരിച്ച്, ആർട്ടിഫിഷ്യൽ ഇന്റലിജൻസ് (AI) അല്ലെങ്കിൽ മെഷീൻ ലേണിംഗ് സാങ്കേതികവിദ്യകൾ—ലാർജ് ലാംഗ്വേജ് മോഡലുകൾ, ജനറേറ്റീവ് AI പ്ലാറ്റ്‌ഫോമുകൾ, ജനറൽ പർപ്പസ് AI അസിസ്റ്റന്റുകൾ എന്നിവ ഉൾപ്പെടെ—പ്രാഥമിക പ്രവർത്തനമായി ഉപയോഗിക്കുന്ന AI ദാതാക്കൾക്ക് വാട്ട്‌സ്ആപ്പ് ബിസിനസ് സൊല്യൂഷൻ ഇനി ഉപയോഗിക്കാൻ കഴിയില്ല. കഴിഞ്ഞ വർഷം പുറത്തിറക്കിയ OpenAI-യുടെ ChatGPT ബോട്ടും ഈ വർഷം അവതരിപ്പിച്ച Perplexity-യുടെ ബോട്ടും ഇതോടെ പ്ലാറ്റ്‌ഫോമിൽ നിന്ന് പുറത്താകും. എന്നാൽ, ഉപഭോക്തൃ പിന്തുണ ആവശ്യങ്ങൾക്കായി AI ഉപയോഗിക്കുന്ന ബിസിനസുകളെ ഈ നിയന്ത്രണം ബാധിക്കില്ലെന്ന് മെറ്റാ വ്യക്തമാക്കിയിട്ടുണ്ട്. ഉദാഹരണത്തിന്, ഉപഭോക്തൃ പിന്തുണയ്ക്കായി ഒരു ട്രാവൽ കമ്പനി പ്രവർത്തിപ്പിക്കുന്ന സപ്പോർട്ട് ബോട്ടിന് ഇത് ഒരു പ്രശ്നമാകില്ല. വാട്ട്‌സ്ആപ്പ് ബിസിനസ് API-യുടെ ഉദ്ദേശ്യം ബിസിനസുകളെ ഉപഭോക്തൃ പിന്തുണ നൽകാനും പ്രസക്തമായ അപ്‌ഡേറ്റുകൾ അയക്കാനും സഹായിക്കുക എന്നതാണ്. ഈ നയപരമായ മാറ്റത്തിന് പിന്നിൽ പ്രധാനമായും മൂന്ന് കാരണങ്ങളാണ് മെറ്റാ ചൂണ്ടിക്കാട്ടുന്നത്: API-യുടെ രൂപകൽപ്പന, മെസ്സേജ് വോളിയത്തിലെ വർദ്ധനവ്, ധനസമ്പാദന (monetisation) ആശങ്കകൾ എന്നിവയാണ് അവ. ഈ അപ്‌ഡേറ്റ് നിലവിൽ വരുന്നതോടെ, മെറ്റാ AI മാത്രമായിരിക്കും പ്ലാറ്റ്‌ഫോമിൽ ലഭ്യമായ ഏക AI അസിസ്റ്റന്റ്.