വെന്റിലേറ്ററിൽ കഴിയവെ എയർ ഹോസ്റ്റസിന് നേരെ ലൈംഗികാതിക്രമം; സംഭവം വനിതാ നഴ്‌സുമാർ കൂടെയുള്ളപ്പോഴെന്നും പരാതിക്കാരി

വെന്റിലേറ്ററിൽ കഴിയവെ എയർ ഹോസ്റ്റസിനെ ലൈംഗികമായി പീഡിപ്പിച്ച് ആശുപത്രി ജീവനക്കാർ. ഗുരുഗ്രാമിലെ സ്വകാര്യ ആശുപത്രിയിൽ ആണ് ഞെട്ടിക്കുന്ന സംഭവം ഉണ്ടായത്. ഏപ്രിൽ 6 ന് ആയിരുന്നു സംഭവം നടന്നത്. ഏപ്രിൽ 13 ന് ഡിസ്ചാർജ് ചെയ്ത ശേഷം ലൈംഗികാതിക്രമത്തെക്കുറിച്ച് ഭർത്താവിനോട് പറഞ്ഞപ്പോഴാണ് സംഭവം പുറത്തുവന്നത്. ഇതോടെ ഭർത്താവ് പൊലീസിൽ അറിയിക്കുകയായിരുന്നു. 46 കാരിയായ സ്ത്രീയുടെ പരാതിയുടെ അടിസ്ഥാനത്തിൽ സദർ പോലീസ് സ്റ്റേഷനിൽ കേസ് രജിസ്റ്റർ ചെയ്തു, പോലീസ് സംഭവം അന്വേഷിച്ചുവരികയാണ്.

വിമാനയാത്രാ പരിശീലനത്തിനായി ഗുരുഗ്രാമിലെത്തിയ സ്ത്രീ താമസിച്ചിരുന്ന ഹോട്ടൽ നീന്തൽക്കുളത്തിൽ അപകടത്തിൽ പെട്ടു. അടിയന്തര പരിചരണത്തിനായി അവരെ ഒരു സ്വകാര്യ ആശുപത്രിയിൽ പ്രവേശിപ്പിച്ചു. പിന്നീട്, ഏപ്രിൽ 6 ന്, ആരോഗ്യം വഷളായതിനെത്തുടർന്ന് ഭർത്താവ് അവരെ സദർ പ്രദേശത്തെ മറ്റൊരു സ്വകാര്യ ആശുപത്രിയിലേക്ക് മാറ്റി. അവിടെയാണ് സംഭവം നടന്നതെന്ന് ആരോപിക്കപ്പെടുന്നു. വെന്റിലേറ്ററിന്റെ സഹായത്തോടെ അർദ്ധബോധാവസ്ഥയിൽ ആയിരുന്നപ്പോൾ ഒരു പുരുഷ നഴ്‌സ് ലൈംഗികമായി പീഡിപ്പിച്ചു. സംഭവസമയത്ത് രണ്ട് വനിതാ നഴ്‌സുമാർ സമീപത്തുണ്ടായിരുന്നുവെന്നും അവർ പറയുന്നു. ഗുരുതരമായ അവസ്ഥ കാരണം അനങ്ങാനോ നിലവിളിക്കാനോ ചെറുത്തുനിൽക്കാനോ കഴിഞ്ഞില്ല.

ഏപ്രിൽ 13ന് അവർ ആശുപത്രിയിൽ നിന്ന് ഡിസ്ചാർജ് ചെയ്യപ്പെട്ടു. വീട്ടിലേക്ക് മടങ്ങിയെത്തിയ അവർ ഭർത്താവിനോട് പീഡനത്തെക്കുറിച്ച് അറിയിക്കുകയും 112 എന്ന ഹെൽപ്പ് ലൈൻ നമ്പറിൽ ബന്ധപ്പെടുകയും ചെയ്തു. തുടർന്ന് ദമ്പതികൾ തങ്ങളുടെ നിയമോപദേശകന്റെ സഹായത്തോടെ സദർ പോലീസ് സ്റ്റേഷനിൽ ഔദ്യോഗികമായി പരാതി നൽകി.

പരാതിയെത്തുടർന്ന് ഗുരുഗ്രാം പോലീസ് ലൈംഗികാതിക്രമവുമായി ബന്ധപ്പെട്ട ഭാരതീയ ന്യായ സംഹിത (ബിഎൻഎസ്) നിയമത്തിലെ പ്രസക്തമായ വകുപ്പുകൾ പ്രകാരം കേസ് രജിസ്റ്റർ ചെയ്തു. എഫ്‌ഐആർ രജിസ്റ്റർ ചെയ്തിട്ടുണ്ടെന്നും പൂർണ്ണമായ അന്വേഷണം നടക്കുന്നുണ്ടെന്നും പോലീസ് പിആർഒ സ്ഥിരീകരിച്ചു .ആശുപത്രി അധികൃതർ വിഷയത്തിൽ ഇതുവരെ പ്രതികരിച്ചിട്ടില്ല.