എണ്ണ കുറച്ച് ഒരു ഹെൽത്തി മീൻ ഫ്രൈ ആയാലോ ഇന്ന്; പ്രഷർ കുക്കറിൽ കിടിലൻ മീന്‍ പൊരിച്ചത് പരീക്ഷിക്കാം

മീൻ കറികളോടുള്ളതിനേക്കാൾ പൊരിച്ചതിനോടാണ് പലർക്കും പ്രിയം. നല്ല എണ്ണയിൽ കിടിലൻ മസാല കൂട്ടുകളൊക്കെ ചേർത്ത് ഉണ്ടാക്കിയെടുക്കുന്ന മീൻ പൊരിച്ചതൊക്കെ ആർക്കാണ് ഇഷ്ടമല്ലാത്തത്. നല്ല മത്തി പൊരിച്ചത് കൂട്ടി ചോറ് കഴിക്കാന്‍ ഇഷ്ടമല്ലാത്തവർ ആരുണ്ട്.

എന്നാൽ ഇങ്ങനെ എണ്ണയിൽ പൊരിച്ചെടുക്കുന്ന മീൻ ഫ്രൈ ആരോഗ്യത്തിന് അത്ര നല്ലതല്ല എന്ന് നമുക്കറിയാം. ഇന്ന് നമുക്കൊരു ഹെൽത്തി മീൻ പൊരിച്ചത് പരീക്ഷിക്കാം. അതും പ്രഷർ കുക്കർ ഉപയോഗിച്ച് നിമിഷ നേരം കൊണ്ട് നമുക്ക് ഉണ്ടാക്കിയെടുക്കാം.

ആവശ്യമായ സാധനങ്ങൾ

മത്തി
പച്ചമുളക് – 5 എണ്ണം
ഉള്ളി അരിഞ്ഞത്-1

വെളുത്തുള്ളി
ഇഞ്ചി
പെരുംജീരകം – 1 ടീസ്പൂൺ
ചുവന്ന മുളക് പൊടി-1 ടീസ്പൂൺ
കശ്മീരി മുളകുപൊടി 1 1 /2 ടീസ്പൂൺ
കുരുമുളക് പൊടി- 1 ടീസ്പൂൺ
3 കഷ്ണം പുളി
കറിവേപ്പില
വെള്ളം 1/2 കപ്പ്
ഉപ്പ്
എണ്ണ

തയ്യാറാക്കുന്ന വിധം

ആദ്യം ഇഞ്ചി, വെളുത്തുള്ളി, പെരുംജീരകം, മുളക് പൊടി, കശ്മീരി മുളകുപൊടി, കുരുമുളക് പൊടി, ഉപ്പ്, കറിവേപ്പില, എണ്ണ, വെള്ളം എന്നിവ ഒരു മിക്സിയുടെ ജാറില്‍ അടിച്ചെടുക്കുക.
ഇതിലേക്ക് നന്നായി കഴുകി വൃത്തിയാക്കിയ മത്തി നന്നായി വരഞ്ഞ് അതിൽ ഈ മിക്സ് നന്നായി ചേര്‍ത്ത് പിടിപ്പിക്കുക. അര മണിക്കൂര്‍ റെസ്റ്റ് ചെയ്യാൻ വയ്ക്കുക.
ഇനി പ്രെഷര്‍ കുക്കര്‍ അടുപ്പിൽ വച്ച് അതിലേക്ക് എണ്ണ ഒഴിക്കുക. ശേഷം ഇതിൽ ഉള്ളി അരിഞ്ഞത് ചേര്‍ത്ത് വഴറ്റുക. ശേഷം, മസാല പുരട്ടി വച്ച മത്തി ഓരോന്നായി ഇതിലേക്ക് വയ്ക്കുക. ഇതിൽ അല്‍പ്പം പുളിവെള്ളം ഒഴിച്ച് എല്ലാഭാഗത്തും മിക്സ് ചെയ്ത ശേഷം ഇതിന് മുകളില്‍ കറിവേപ്പില ഇട്ട് കുക്കര്‍ അടച്ച് വേവിക്കുക. ഒരു വിസില്‍ വന്നാല്‍ തീ ഓഫ് ചെയ്ത് വിസില്‍ പോയ ശേഷം തുറക്കുക. രുചിയൂറും മീൻ പൊരിച്ചത് റെഡി.