വളാഞ്ചേരിയില്‍ വില്ലേജ് ഓഫീസില്‍ പരിശോധന നടത്തി വിജിലൻസ്; മദ്യവും പണവും പിടിച്ചെടുത്തു

 

 മലപ്പുറം: വളാഞ്ചേരി കാട്ടിപ്പരിത്തി വില്ലേജ് ഓഫീസില് വിജിലൻസ് നടത്തിയ മിന്നൽ പരിശോധനയില് മദ്യവും പണവും പിടിച്ചെടുത്തു. വില്ലേജ് ഫീൽഡ് അസിസ്റ്റന്റ് ഷറഫുദീന്റെ കൈയ്യിൽ നിന്നാണ് 1970 രൂപ പിടിച്ചെടുത്തത്. കാറിനുള്ളില് നടത്തിയ പരിശോധനയില് 11500 രൂപയും കണ്ടെത്തി. ഓഫീസിനകത്തെ മേശയില് നിന്ന് പാതി ഉപയോഗിച്ച നിലയില് കുപ്പിയിലുള്ള മദ്യം വിജിലൻസ് പിടിച്ചെടുത്തു. ഫീൽഡ് അസിസ്റ്റന്റ് ഷറഫുദ്ദീനെതിരെ നിരവധി പരാതികള് ഉയർന്നിരുന്നു. സേവനത്തിനായി എത്തുന്നവരിൽ നിന്ന് കൈക്കൂലി ഈടാക്കുന്നതായും പരാതി ഉണ്ടായിരുന്നു. ഇതുസംബന്ധിച്ച നിരവധി പരാതികള് മലപ്പുറം വിജിലൻസിനും ലഭിച്ചിരുന്നു. ഇതിന്റെ അടിസ്ഥാനത്തിലായിരുന്നു മിന്നൽ പരിശോധന.