.jpg)
ന്യൂഡല്ഹി: രാജ്യത്ത് പാചകവാതക സിലിണ്ടര് ബുക്കിങ്ങിന് നിയന്ത്രണം. പശ്ചിമേഷ്യന് സംഘര്ഷങ്ങളുടെ പശ്ചാത്തലത്തില് എല്പിജി ക്ഷാമം നേരിട്ടേയ്ക്കുമെന്ന റിപ്പോര്ട്ടുകളെ തുടര്ന്ന് ബുക്കിങ്ങില് ഉണ്ടായ ഉയര്ച്ചയാണ് നിയന്ത്രണത്തിന് പിന്നില്. എല്പിജി റീഫില്ലുകള്ക്ക് എണ്ണ വിതരണ കമ്പനികൾ 21 ദിവസത്തെ ലോക്ക്-ഇന് പിരീഡ് ഏര്പ്പെടുത്തി. നിയന്ത്രണം വെള്ളിയാഴ്ച മുതല് പ്രാബല്യത്തില് വന്നു. ഒരു സിലിണ്ടര് ബുക്ക് ചെയ്ത് 21 ദിവസങ്ങള്ക്ക് ശേഷം മാത്രമേ ഇനി മുതല് അടുത്ത സിലിണ്ടര് ബുക്ക് ചെയ്യാന് സാധിക്കുകയുള്ളു. വാണിജ്യ സിലിണ്ടര് ബുക്കിങ്ങിലും നിയന്ത്രണം ഏര്പ്പെടുത്തിയിട്ടുണ്ട്. അതിനിടെ, എല്പിജി ഉത്പാദനം പരമാവധിയാക്കാന് കേന്ദ്രം എണ്ണ കമ്പനികള്ക്ക് നിര്ദ്ദേശം നല്കി. 1955 ലെ അവശ്യസാധന നിയമപ്രകാരമാണ് സര്ക്കാര് നിര്ദേശം. എണ്ണക്കമ്പനികളുടെ പക്കലുള്ള അധിക എല്പിജി പൊതുമേഖലയ്ക്ക് മാത്രം നല്കണമെന്നുള്പ്പെടെയാണ് നിര്ദേശം. എല്പിജി, പ്രൊപ്പെയ്ന്, ബ്യൂട്ടെയ്ന് എന്നിവ പൊതുമേഖല എണ്ണകമ്പനികള്ക്ക് നല്കണം. ഇവ മറ്റാവശ്യങ്ങള്ക്ക് ഉപയോഗിക്കരുത്. എല്ലാ എണ്ണ ശുദ്ധീകരണ കമ്പനികളും തങ്ങളുടെ കൈവശമുള്ള പ്രൊപ്പെയ്ന്, ബ്യൂട്ടെയ്ന് എന്നിവ എല്പിജി ഉല്പാദനത്തിനായി പരമാവധി ഉപയോഗിക്കുന്നുവെന്ന് ഉറപ്പാക്കണം എന്നുമാണ് സര്ക്കാര് നിര്ദേശം.
Post a Comment