‘മറ്റുസ്ഥലങ്ങളിൽ ​ഗംഭീരം എന്ന് പറയുന്നവർ തന്നെയാണ് കേരളത്തിന്റെ മദ്യനയത്തെ എതിർക്കുന്നത്’: മന്ത്രി എം ബി രാജേഷ്

ആധുനിക ലോകത്തിലെ മാറ്റങ്ങളും നിയന്ത്രണങ്ങൾ വേണമെന്ന വാദവും കണക്കിലെടുത്ത് സംസ്ഥാനത്തെ മദ്യനയത്തിൽ സർക്കാർ നിർണ്ണായകമായ പരിഷ്കരണങ്ങൾ കൊണ്ടുവരുന്നു. മദ്യനയത്തെ, അതിനോടുള്ള സമീപനത്തെ പരിഷ്കരിക്കാനാണ് ​ഗവൺമെന്റ് ശ്രമിച്ചിട്ടുള്ളത്. മറ്റുള്ള സ്ഥലങ്ങളിൽ ​ഗംഭീരം എന്ന് പറയുന്നവർ തന്നെയാണ് കേരളത്തിലെ തീരുമാനങ്ങളെ എതിർക്കുകയും ചെയ്യുന്നതെന്ന് മന്ത്രി എം ബി രാജേഷ് വിശദീകരിച്ചു. കേവലം നിയന്ത്രണങ്ങൾ ഏർപ്പെടുത്തുക എന്നതിലുപരി, മാറുന്ന സാമൂഹ്യ യാഥാർത്ഥ്യങ്ങളെ അഭിസംബോധന ചെയ്യാനാണ് സർക്കാർ ശ്രമിക്കുന്നതെന്ന് മന്ത്രി പറഞ്ഞു. ടൂറിസം കേന്ദ്രങ്ങളിൽ നിലവിലുണ്ടായിരുന്ന സമയക്രമം (രാവിലെ 11 മുതൽ രാത്രി 12 വരെ) ഇപ്പോൾ സംസ്ഥാനത്തെ മറ്റ് പ്രദേശങ്ങളിലേക്കും ബാധകമാക്കിയിട്ടുണ്ട്. ഇത് ഇന്ത്യയിലെ മറ്റ് സംസ്ഥാനങ്ങളിലെ സമയക്രമത്തോട് ഏകദേശം തുല്യമാകാനുള്ള ശ്രമത്തിന്റെ ഭാഗമായാണെന്നാണ് വിലയിരുത്തപ്പെടുന്നത്. ദക്ഷിണേന്ത്യയിൽ ഏറ്റവും ഉയർന്ന ലൈസൻസ് ഫീസ് ഈടാക്കുന്ന സംസ്ഥാനമായി കേരളം മാറിയിരിക്കുകയാണ്. മുൻപ് 12 ലക്ഷം രൂപയായിരുന്ന ലൈസൻസ് ഫീസ് നിലവിലെ സർക്കാർ 35 ലക്ഷം രൂപയായാണ് വർദ്ധിപ്പിച്ചത്. അയൽ സംസ്ഥാനമായ കർണാടകയിൽ ഇത് 6 മുതൽ 10 ലക്ഷം രൂപ വരെ മാത്രമാണ്. അയൽ സംസ്ഥാനങ്ങളെ അപേക്ഷിച്ച് കേരളത്തിൽ മദ്യശാലകളുടെ എണ്ണം വളരെ കുറവാണെന്നാണ് കണക്കുകൾ സൂചിപ്പിക്കുന്നത്. കർണാടകയിലും തമിഴ്നാട്ടിലും 5,600-ഓളം ഔട്ട്‌ലെറ്റുകൾ വീതമുള്ളപ്പോൾ, കേരളത്തിൽ ബാറുകളും റീട്ടെയിൽ ഔട്ട്‌ലെറ്റുകളും ഉൾപ്പെടെ ആകെ 1,442 എണ്ണം മാത്രമാണുള്ളത്. തെലങ്കാനയിൽ 2,600-ഉം ആന്ധ്രയിൽ ഇതിന്റെ ഇരട്ടിയോളം ഔട്ട്‌ലെറ്റുകളും ഉണ്ട്. ഉപഭോഗവും മയക്കുമരുന്ന് വിരുദ്ധ പോരാട്ടവും പുതിയ പരിഷ്കരണങ്ങൾക്കിടയിലും സംസ്ഥാനത്ത് മദ്യത്തിന്റെ ഉപഭോഗം കുറഞ്ഞതായാണ് കണക്കുകൾ വ്യക്തമാക്കുന്നത്. കൂടാതെ, മയക്കുമരുന്നിനെതിരെയുള്ള പോരാട്ടത്തിൽ വലിയ വിജയം കൈവരിക്കാൻ സർക്കാരിന് കഴിഞ്ഞിട്ടുണ്ടെന്നും മന്ത്രി വിശദീകരിച്ചു. മദ്യനയത്തെക്കുറിച്ചുള്ള തെറ്റായ പ്രചരണങ്ങൾ രാഷ്ട്രീയ ലക്ഷ്യത്തോടെയുള്ളതാണെന്നും മന്ത്രി പറഞ്ഞു.