ഹിന്ദുക്കൾക്കെതിരെ സംസാരിച്ചാൽ ബാബറി മസ്ജിദ് തകർത്തത് പോലെ രാഹുൽഗാന്ധിയുടെ പരമ്പരയെ ഇല്ലാതാക്കുമെന്ന് പ്രസ്താവന’; ബിജെപി എംഎൽഎക്കെതിരെ കേസെടുത്ത് പൊലിസ്

 

രാഹുൽ ഗാന്ധിക്ക് എതിരെ വിദ്വേഷ പരാമർശം. കർണാടകയിലെ ബിജെപി എംഎൽഎ യശ്പാൽ സുവർണയ്ക്കെതിരെ കേസെടുത്ത് പൊലിസ്. ഹിന്ദുക്കൾക്കെതിരെ സംസാരിച്ചാൽ ബാബറി മസ്ജിദ് തകർത്തത് പോലെ രാഹുൽഗാന്ധിയുടെ പരമ്പരയെ ഇല്ലാതാക്കുമെന്നായിരുന്നു പ്രസ്താവന. ഉടുപ്പി പോലീസാണ് കേസെടുത്തത്.ചൊവ്വാഴ്ച ഉഡുപ്പിയിലെ സർവീസ് ബസ് സ്റ്റാൻഡിന് സമീപം നടന്ന പ്രതിഷേധ പ്രകടനത്തിനിടെ സുവർണ്ണ അപകീർത്തികരവും പ്രകോപനപരവുമായ പ്രസ്താവനകൾ നടത്തിയെന്ന് ആരോപിച്ച് ജില്ലാ കോൺഗ്രസ് കമ്മിറ്റി പ്രസിഡന്റ് അശോക് കൊടവൂർ നൽകിയ പരാതിയുടെ അടിസ്ഥാനത്തിൽ ഉഡുപ്പി ടൗൺ പോലീസ് സ്റ്റേഷനിൽ കേസ് രജിസ്റ്റർ ചെയ്തതായി പൊലീസ് പറഞ്ഞു.

നീറ്റ് പരീക്ഷാ പേപ്പർ ചോർച്ച വിഷയത്തിൽ പ്രതിഷേധത്തിൽ പങ്കെടുത്ത വിദ്യാർത്ഥികൾക്കെതിരെ സുവർണ്ണ മോശം ഭാഷ ഉപയോഗിച്ചുവെന്നും കോൺഗ്രസ് അനുയായികൾക്കെതിരെ ബിജെപി പ്രവർത്തകരെ പ്രകോപിപ്പിക്കാൻ ശ്രമിച്ചുവെന്നും അതുവഴി പൊതുസമാധാനത്തിന് ഭീഷണിയുണ്ടെന്നും പരാതിയിൽ ആരോപിക്കുന്നു.ഭാരതീയ ന്യായ സംഹിതയിലെ വകുപ്പുകൾ പ്രകാരമാണ് പോലീസ് കേസ് രജിസ്റ്റർ ചെയ്തിരിക്കുന്നത്. ഗ്രൂപ്പുകൾക്കിടയിൽ ശത്രുത വളർത്തൽ, കലാപത്തിന് പ്രേരിപ്പിക്കൽ, ക്രിമിനൽ ഭീഷണി, പൊതുജനങ്ങളെ കുഴപ്പത്തിലാക്കുന്ന പ്രസ്താവനകൾ എന്നിവയ്ക്കാണ് കേസെടുത്തിരിക്കുന്നത്.