ലഹരിവിരുദ്ധ ബോധവത്കരണ ക്ലാസും ഏകപാത്ര നാടകവും നടത്തി

ലഹരിയുടെ വിഷധൂളികളുമായി പിഞ്ചു കുഞ്ഞുങ്ങളെപ്പോലും ചതിക്കുഴിയിൽ പെടുത്തുന്ന കാപാലികർക്കെതിരെ ജനമനസുകളെ ജാഗ്രതപ്പെടുത്തുന്നതിനും പുതുതലമുറക്ക് ജീവിത ദിശാബോധം പകരുന്നതിനുമായി കേരള സർക്കാരിൻ്റെ വിമുക്തി നാലാംഘട്ട ലഹരിവിരുദ്ധ പ്രചരണ പരിപാടികളുടെ ഭാഗമായി പേരാവൂർ എക്‌സൈസ് റെയിഞ്ച് ഓഫിസും അമ്പായത്തോട് ടാഗോർ വായനശാലയും സംയുക്തമായി ലഹരിക്കെതിരെ ജനകീയ ബോധവൽക്കരണ ക്ലാസും ഏകപാത്ര നാടകവും സംഘടിപ്പിച്ചു.  ശനിയാഴ്ച വൈകിട്ട് നാലുമണിക്ക് അമ്പായത്തോട് ക്ഷീര സംഘം ഹാളിൽ നടന്ന പരിപാടി പേരാവൂർ ബ്ലോക്ക് പഞ്ചായത്ത് മെമ്പർ കെ എൻ സുനീന്ദ്രൻ ഉദ്ഘാടനം ചെയ്തു. പേരാവൂർ റെയിഞ്ച് എക്സൈസ് ഇൻസ്പെക്ടർ പി ടി യേശുദാസൻ ആമുഖഭാഷണം നടത്തി. അസിസ്റ്റന്റ് എക്സൈസ് ഇൻസ്‌പെക്ടർ സുകേഷ്കുമാർ വണ്ടിച്ചാലിൽ ബോധവൽക്കരണ ക്ലാസ് നയിച്ചു. തുടർന്ന് അരവിന്ദാക്ഷൻ കൊതേരിയുടെ 'മൂക്കുത്തി' എന്ന ലഹരിവിരുദ്ധ ഏകപാത്ര നാടകം  അരങ്ങേറി. ചടങ്ങിൽ വായനശാല പ്രസിഡൻ്റ് മാത്യു കൊച്ചുതറ അധ്യക്ഷത വഹിച്ചു. സെക്രട്ടറി ഒ എം കുര്യാച്ചൻ സ്വാഗതവും സിവിൽ എക്സൈസ് ഓഫീസർ പി എസ് ശിവദാസൻ നന്ദിയും പറഞ്ഞു. രക്ഷിതാക്കളും വിദ്യാർത്ഥികളുമുൾപ്പെടെ 120 പേർ പങ്കെടുത്തു.