കോഴിക്കോട് പ്ലസ് വണ്‍ വിദ്യാര്‍ത്ഥിയെ ഒഴുക്കിപ്പെട്ട് കാണാതായി

കോഴിക്കോട് കോടഞ്ചേരി പതങ്കയത്ത് പ്ലസ് വണ്‍ വിദ്യാര്‍ത്ഥിയെ ഒഴുക്കിപ്പെട്ട് കാണാതായി. മഞ്ചേരിയില്‍ നിന്നും വന്ന ആറംഗ സംഘത്തില്‍പെട്ട പ്ലസ് വണ്‍ വിദ്യാര്‍ത്ഥി അലന്‍ അഷ്റഫിനെയാണ് കാണാതായത്. ഉച്ചയ്ക്ക് 12 മണിയോടെയാണ് സംഭവം.

ഇരുവഴിഞ്ഞിപ്പുഴയുടെ സമീപത്ത് നിന്ന് കൂട്ടുകാരുമൊത്ത് കുളിക്കുന്നതിനിടെയാണ് അപകടം. വിദ്യാര്‍ഥിക്കായി തെരച്ചില്‍ തുടരുകയാണ്. മുക്കം ഫയർഫോഴ്സും പൊലീസും നാട്ടുകാരും ചേർന്ന് തിരച്ചിൽ ഊർജിതമാക്കി.  ഡ്രോൺ അടക്കമുള്ള സാങ്കേതികവിദ്യയുടെ സഹായത്തോടെയാണ് തെരച്ചിൽ നടത്തുന്നത്  പതങ്കയത്തിന് തൊട്ടു താഴെ ഇതിനു മുൻപ് മറ്റൊരു അപകടം നടന്ന സ്ഥലത്തുനിന്നാണ് വിദ്യാർഥിയെ കാണാതായത്. പ്രദേശത്ത് അപകടങ്ങൾ പതിവായതിനാൽ പുഴയിൽ ഇറങ്ങുന്നതിന് അധികൃതർ വിലക്കേർപ്പെടുത്തിയിട്ടുണ്ട്. ഈ മുന്നറിയിപ്പുകൾ അവഗണിച്ചാണ് പലരും പുഴയിൽ ഇറങ്ങാറുള്ളത്. പാറക്കെട്ടുകൾ നിറഞ്ഞ പ്രദേശമായതിനാൽ കാൽ വഴുതി വീണതാവാമെന്നാണ് പ്രാഥമിക നിഗമനം.