മലയാള സിനിമയിൽ നിന്ന് മറ്റെല്ലാ ഇൻഡസ്ട്രികളും പഠിക്കേണ്ട ഒരു കാര്യമുണ്ട്: നാനി

മലയാള സിനിമയെ പുകഴ്ത്തി തെലുങ്ക് സിനിമാ താരം നാനി. പാരഡൈസ് എന്ന ചിത്രത്തിന്റെ പ്രമോഷന്റെ ഭാഗമായി കേരളത്തിൽ എത്തിയപ്പോഴാണ് പ്രസ്മീറ്റിൽ വെച്ച് താരം മലയാള സിനിമയോടുള്ള ഇഷ്ടവും ബഹുമാനവും അദ്ദേഹം വ്യക്തമാക്കിയത്. ചുരുങ്ങിയ സമയത്തിനുള്ളിൽ വളരെ കുറഞ്ഞ റിസോഴ്‌സ് ഉപയോഗിച്ച് മലയാള സിനിമ ഏറ്റവും മികച്ച സിനിമകളാണ് നിർമിക്കുന്നത് എന്നും അത് മറ്റെല്ലാ സിനിമാ ഇൻഡസ്ട്രികളും കണ്ടുപഠിക്കേണ്ടതാണെന്നും നാനി പറഞ്ഞു. 'മലയാള സിനിമ എനിക്ക് എത്രത്തോളം ഇഷ്ടമാണെന്ന് ഞാൻ നേരത്തെയും പല തവണ പറഞ്ഞിട്ടുണ്ട്. മലയാള സിനിമയിൽ നിന്ന് ഒരുപാട് കാര്യങ്ങൾ പഠിക്കാനുണ്ട്. അതിലൊന്ന് സിനിമ നിർമിക്കാൻ അവർ എടുക്കുന്ന സമയാണ്. കുറഞ്ഞ സമയം കൊണ്ടാണ് ഇവിടെ സിനിമകൾ പൂർത്തിയാകുന്നത്. മറ്റൊന്ന് കുറഞ്ഞ ചെലവാണ്. എന്നിട്ടും അവർ ഏറ്റവും മികച്ച സിനിമകൾ ഒരുക്കുന്നു. കുറഞ്ഞ സമയവും റിസോഴ്‌സും ഉപയോഗിച്ച് ഗംഭീരമായ പ്രമേയങ്ങളും പെർഫോമൻസുമുള്ള മികച്ച ക്വാളിറ്റിയുള്ള സിനിമകളാണ് മലയാളത്തിൽ നിന്നും വരുന്നത്. അക്കാര്യം എല്ലാ ഇൻഡസ്ട്രികളും തീർച്ചയായും കണ്ടുപഠിക്കേണ്ടതാണ്,' നാനി പറഞ്ഞു. അതേസമയം, നാനി നായകനായി എത്തുന്ന ബിഗ് ബജറ്റ് ചിത്രമായ 'ദ പാരഡൈസ്' വമ്പൻ റിലീസായി കേരളത്തിലെത്തിക്കുന്നത് ദുൽഖർ സൽമാന്റെ വേഫെറർ ഫിലിംസാണ്. ശ്രീലക്ഷ്മി വെങ്കടേശ്വര സിനിമാസിന്റെ ബാനറിൽ ഒരുങ്ങുന്ന ചിത്രം 2026 സെപ്റ്റംബർ 24ന് ആഗോള റിലീസായി തിയേറ്ററുകളിലെത്തും. 'ദസറ' എന്ന ബ്ലോക്ക്ബസ്റ്റർ ചിത്രത്തിന് ശേഷം നാനിയും ശ്രീകാന്ത് ഒഡേലയും വീണ്ടും ഒന്നിക്കുന്ന ചിത്രമാണ് 'ദ പാരഡൈസ്'. 'ദസറ'യുടെ നിർമ്മാതാവായ സുധാകർ ചെറുകുറി തന്നെയാണ് ഈ ചിത്രവും നിർമ്മിക്കുന്നത്. വമ്പൻ കാൻവാസിൽ ആക്ഷന് പ്രാധാന്യം നൽകിയൊരുക്കിയ ചിത്രം ഒരു അമ്മ - മകൻ ബന്ധത്തിന്റെ വൈകാരിക കഥ കൂടിയാണ് പറയുന്നതെന്ന് നാനി വെളിപ്പെടുത്തിയിരുന്നു. 'ജേഴ്‌സി', 'ഗാങ് ലീഡർ' എന്നീ ചിത്രങ്ങൾക്ക് ശേഷം നാനിയും അനിരുദ്ധ് രവിചന്ദറും ഒന്നിക്കുന്ന ചിത്രം കൂടിയാണ് 'ദ പാരഡൈസ്'. ചിത്രത്തിലെ ഇതിനോടകം പുറത്ത് വന്ന 'ആയാ ഷേർ' , 'യേഷാ നഗുല' എന്നീ ഗാനങ്ങൾ സമൂഹ മാധ്യമങ്ങളിൽ വൈറലാണ്. നാനിയുടെ കരിയറിലെ ഏറ്റവും വലിയ പ്രോജക്ട് ആയി ഒരുക്കിയ ഈ ചിത്രത്തിൽ, നാനി അവതരിപ്പിക്കുന്ന ജദാൽ എന്ന കഥാപാത്രത്തെ താരത്തിന്റെ കരിയറിലെ തന്നെ ഏറ്റവും വലിയ മാസ്സ് അവതാരമായാണ് രൂപപ്പെടുത്തിയിരിക്കുന്നത്. നേരത്തെ പുറത്തിറങ്ങിയ ചിത്രത്തിന്റെ ടീസർ സൂപ്പർ ഹിറ്റായി മാറിയിരുന്നു. ത്രസിപ്പിക്കുന്ന ആക്ഷൻ രംഗങ്ങൾ, മാസ്സ് ഡയലോഗുകൾ, ബ്രഹ്‌മാണ്ഡ ദൃശ്യങ്ങൾ എന്നിവയിലൂടെ ടീസർ വലിയ ശ്രദ്ധ നേടിയെടുത്തു. ചിത്രത്തിൽ വയലൻസിനും ആക്ഷനും നൽകുന്ന പ്രാധാന്യവും ടീസർ കാണിച്ചു തരുന്നു. കിൽ എന്ന ചിത്രത്തിലൂടെ ശ്രദ്ധ നേടിയ ബോളിവുഡ് താരം രാഘവ് ജൂയൽ ആണ് ഈ ചിത്രത്തിൽ വില്ലൻ വേഷത്തിലെത്തുന്നത്. വിക്രം മാലിക് എന്ന കഥാപാത്രത്തെയാണ് രാഘവ് അവതരിപ്പിക്കുന്നത്. നേരത്തെ പുറത്തിറങ്ങിയ അദ്ദേഹത്തിന്റെ ഗ്ലിമ്പ്‌സ് വീഡിയോയും ഏറെ ശ്രദ്ധ നേടി. നാനി, രാഘവ് ജൂയൽ എന്നിവർക്ക് പുറമെ കായദു ലോഹർ, സമ്പൂർണേഷ് ബാബു, മോഹൻ ബാബു, സോണാലി കുൽക്കർണി, ഈശ്വരി റാവു, രാജ രവീന്ദ്ര, തനികേല ഭരണി, എം എസ് ചൗധരി, രാം ജഗൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. തെലുങ്ക്, കന്നഡ, മലയാളം, തമിഴ്, ഹിന്ദി, ബംഗാളി, ഇംഗ്ലീഷ്, സ്പാനിഷ് എന്നീ എട്ട് ഭാഷകളിലാണ് ചിത്രം ആഗോള തലത്തിൽ പ്രദർശനത്തിനെത്തുക. രചന, സംവിധാനം: ശ്രീകാന്ത് ഒഡേല, നിർമ്മാതാവ്: സുധാകർ ചെറുകുറി, ബാനർ: എസ്എൽവി സിനിമാസ്, ഛായാഗ്രഹണം: സി എച്ച് സായ് സംഗീതം: അനിരുദ്ധ് രവിചന്ദർ, എഡിറ്റിംഗ്: നവീൻ നൂലി, പ്രൊഡക്ഷൻ ഡിസൈൻ: അവിനാഷ് കൊല്ല, ഓഡിയോ: സരിഗമ മ്യൂസിക്, മാർക്കറ്റിംഗ്: ഫസ്റ്റ് ഷോ, പിആർഒ: ശബരി