കണ്ണൂർ വിമാനത്താവള യാത്രക്കാർക്ക് തിരിച്ചടിയായി ഗോ ഫസ്റ്റിന്റെ അനിശ്ചിതത്വം

 മട്ടന്നൂർ | ഗോ ഫസ്റ്റ് സർവീസുകളുടെ റദ്ദാക്കൽ കണ്ണൂർ വിമാന താവളത്തിലെ യാത്രക്കാർക്ക് തിരിച്ചടി ആകുന്നു. സാമ്പത്തിക പ്രതിസന്ധിയെ തുടർന്ന് ‘ഗോ ഫസ്റ്റ്’ എയർലൈൻസ് മേയ് 9 വരെയുള്ള സർവീസുകളാണ് റദ്ദാക്കിയത്. 15 വരെയുള്ള ടിക്കറ്റ് വിൽപ്പനയും നിർത്തി.എയർ ഇന്ത്യ എക്സ്പ്രസ്, ഇൻഡിഗോ കമ്പനികൾ മാത്രമാണ് ഇപ്പോൾ കണ്ണൂരിൽ നിന്ന് സർവീസ് നടത്തുന്നത്. കണ്ണൂർ- ഡൽഹി സെക്ടറിൽ സർവീസ് നടത്തിയിരുന്ന എയർ ഇന്ത്യ നേരത്തേ സർവീസ് നിർത്തിയിരുന്നു. കുവൈത്ത്, ദമാം, മുംബൈ എന്നിവിടങ്ങളിലേക്ക് കണ്ണൂരിൽ നിന്ന് ഗോ ഫസ്റ്റ് മാത്രമാണ് സർവീസ് നടത്തിയിരുന്നത്.ദുബായ്, മസ്കറ്റ്, അബുദാബി എന്നിവിടങ്ങളിലേക്ക് എയർ ഇന്ത്യ എക്സ്പ്രസും ഗോഫസ്റ്റും സർവീസ് നടത്തിയിരുന്നത് ടിക്കറ്റ് നിരക്ക് ചെറിയ തോതിൽ എങ്കിലും കുറയാൻ സഹായകമായിരുന്നു. ടിക്കറ്റെടുത്ത യാത്രക്കാർക്ക് പണം തിരികെ നൽകുമെന്ന് ഗോ ഫസ്റ്റ് കമ്പനി അറിയിച്ചിട്ടുണ്ട്.