മോന്സണ് മാവുങ്കല് പ്രതിയായ പുരാവസ്തു തട്ടിപ്പ് കേസില് കെപിസിസി അധ്യക്ഷന് കെ. സുധാകരന് അന്വേഷണ സംഘത്തിന് മുന്നില് ഹാജരാകണമെന്ന് ഹൈക്കോടതി. സുധാകരന് അന്വേഷണവുമായി സഹകരിക്കണമെന്നും ഹൈക്കോടതി നിര്ദേശിച്ചു. കേസില് ജാമ്യം തേടിയുള്ള സുധാകരന്റെ ഹര്ജിയിലാണ് ഹൈക്കോടതി ഉത്തരവ് പുറപ്പെടുവിച്ചത്. സുധാകരന് ഹൈക്കോടതി രണ്ടാഴ്ചത്തെ ഇടക്കാല ജാമ്യം അനുവദിച്ചു.
പുരാവസ്തു തട്ടിപ്പ് കേസില് സുധാകരനെ രണ്ടാം പ്രതിയാക്കിയാണ് ക്രൈംബ്രാഞ്ച് കേസ് രജിസ്റ്റര് ചെയ്തിരിക്കുന്നത്. അറസ്റ്റിനുള്ള സാധ്യത കണക്കിലെടുത്താണ് സുദാകരന് ജാമ്യാപേക്ഷയുമായി ഹൈക്കോടതിയെ സമീപിച്ചത്. ഹര്ജി പരിഗണിച്ച കോടതി സുധാകരന് അന്വേഷണവുമായി സഹകരിക്കണമെന്ന് നിര്ദേശിക്കുകയായിരുന്നു. ജൂണ് 23 ന് അന്വേഷണ സംഘത്തിന് മുന്നില് ഹാജരാകണമെന്നും ഹൈക്കോടതി നിര്ദേശിച്ചു. നേരത്തേ ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് ക്രൈംബ്രാഞ്ച് സുധാകരന് നോട്ടീസ് നല്കിയിരുന്നു. എന്നാല് ചോദ്യം ചെയ്യലിനോട് സഹകരിക്കാന് സുധാകരന് തയ്യാറായില്ല.മോന്സണ് കേസില് സുധാകരനെതിരെ വഞ്ചനാ കുറ്റമാണ് ക്രൈംബ്രാഞ്ച് ചുമത്തിയിരിക്കുന്നത്. ഒരു വര്ഷത്തിലേറെ നീണ്ട അന്വേഷണത്തിനൊടുവില് കഴിഞ്ഞ ദിവസമാണ് കെ. സുധാകരനെ പ്രതിയാക്കിയുള്ള റിപ്പോര്ട്ട് ക്രൈംബ്രാഞ്ച് കോടതിയില് സമര്പ്പിച്ചിരിക്കുന്നത്.മോന്സണ് കേസിലെ പരാതിക്കാര് മുഖ്യമന്ത്രിക്കടക്കം നല്കിയ പരാതിയില് കെ. സുധാകരന്റെ പേരുണ്ടായിരുന്നു. പിന്നാലെ മോന്സന്റെ വീട്ടില് കെ. സുധാകരന് എത്തിയതിന്റെ ചിത്രങ്ങളും പുറത്തുവന്നു. മോന്സണ് മാവുങ്കലിന് പണം കൈമാറാനെത്തിയ ഘട്ടത്തില് കെ. സുധാകരന് അദ്ദേഹത്തിന്റെ കൂടെയുണ്ടായിരുന്നെന്നും പരാതിക്കാര് ചൂണ്ടിക്കാട്ടിയിരുന്നു.