പൊങ്കാലയ്ക്കെത്താം കെഎസ്ആർടിസിയിൽ; ഗുരുവായൂരിൽ നിന്നും ആറ്റുകാൽ ക്ഷേത്രനടയിലേക്ക് സൂപ്പർ ഫാസ്റ്റ് സർവീസ്

തിരുവനന്തപുരം: ചരിത്രത്തിലാദ്യമായി ആറ്റുകാൽ ക്ഷേത്രനടയിൽ നിന്നും ഗുരുവായൂരിലേക്ക് സൂപ്പർ ഫാസ്റ്റ് സർവീസുമായി കെഎസ്ആർടിസി. തിരുവനന്തപുരം സെൻട്രൽ യൂണിറ്റാണ് സർവീസ് നടത്തുന്നത്. ആറ്റുകാൽ ക്ഷേത്രനടയിൽ നിന്നും ആദ്യ സർവീസ് നാളെ പുറപ്പെടും. ഫ്ളാഗ് ഓഫ് കർമ്മം പൊതുവിദ്യാഭ്യാസ, തൊഴിൽ വകുപ്പ് മന്ത്രി വി ശിവൻ കുട്ടി നിർവഹിക്കും. രാത്രി 07:30ന് ആറ്റുകാൽ ക്ഷേത്രത്തിൽ നിന്നും പുറപ്പെട്ട് തിരുവനന്തപുരം സെൻട്രൽ, കൊല്ലം, കായംകുളം, ആലപ്പുഴ, ചേർത്തല, എറണാകുളം, തൃശൂർ വഴി പുലർച്ചെ 04:15ന് ഗുരുവായൂർ എത്തിച്ചേരുന്ന വിധത്തിലാണ് സർവീസ് ക്രമീകരിച്ചരിക്കുന്നത്. മടക്കയാത്ര ഉച്ചയ്ക്ക് 01:15നാണ് ഗുരുവായൂർ നിന്നും പുറപ്പെടുക. തുടർന്ന് രാത്രി 10:40ന് ബസ് ആറ്റുകാൽ ക്ഷേത്രത്തിലെത്തും.