തിരുവനന്തപുരം: സംസ്ഥാനത്ത് ചന്ദനകൃഷിക്കായി സർക്കാർ പദ്ധതി വരുന്നു. ചന്ദനകൃഷിക്ക് സർക്കാർ പ്രോത്സാഹനം നൽകുമെന്ന് സംസ്ഥാന ധനമന്ത്രി കെഎൻ ബാലഗോപാൽ പറഞ്ഞു. സംസ്ഥാന ബജറ്റിലാണ് പ്രഖ്യാപനം. ചന്ദനം സംരക്ഷിക്കാൻ സർക്കാർ സഹായം നൽകുമെന്നാണ് ബജറ്റിലെ പ്രഖ്യാപനം.
ചന്ദനവുമായി ബന്ധപ്പെട്ട നിയമങ്ങളിലും ചട്ടങ്ങളിലും കാലാനുസൃതമായ മാറ്റം കൊണ്ടുവരാനാണ് സർക്കാരിൻ്റെ പദ്ധതി. സ്വകാര്യ ഭൂമിയിൽനിന്ന് മുറിക്കുന്ന ചന്ദനം ശേഖരിക്കുന്നതിനായി സംസ്ഥാനത്തുടനീളം കൂടുതൽ വനം ഡിപ്പോകളെ ചന്ദനത്തിൻ്റെ വനം ഡിപ്പോകളാക്കും. ചന്ദനത്തടികൾക്ക് സർക്കാർ നിർണയിച്ച മൂല്യത്തിൻ്റെ 50 ശതമാനമെങ്കിലും ഉടമസ്ഥർക്ക് മുൻകൂറായി നൽകാനുള്ള ശ്രമങ്ങളാണ് സർക്കാർ നടപ്പിലാക്കാൻ ഒരുങ്ങുന്നതെന്നും കെഎൻ ബാലഗോപാൽ ബജറ്റ് അവതരണത്തിൽ പറഞ്ഞു.