ഇരിട്ടിയിൽ മിൽമ ബൂത്ത് കുത്തി തുറന്ന് മോഷണം

 

Feb 6, 2024 11: 08 AM | By AJESH 

ഇരിട്ടി: ഇരിട്ടി കൂട്ടുപുഴ റോഡിൽ പൊതുമരാമത്ത് വകുപ്പ് ഗസ്റ്റ് ഹൗസിനും പോലീസ് സ്റ്റേഷനും സമീപം പ്രവർത്തിക്കുന്ന മിൽമ ബൂത്ത് ഇന്നലെ രാത്രി കുത്തി തുറന്ന് മോഷണം. മിൽമ ബൂത്തിന്റെ പൂട്ട് പൊളിച്ചാണ് മോഷ്ടാവ് ഉള്ളിൽ പ്രവേശിച്ചത്. രാവിലെ കട തുറക്കാനെത്തിയപ്പോഴാണ് സംഭവം കട ഉടമയുടെ ശ്രദ്ധയിൽ പെട്ടത്. മേശവലിപ്പിൽ സൂക്ഷിച്ചിരുന്ന നാണയങ്ങൾ കൂടാതെ ആയിരം രൂപയിൽ അധികം വരുന്ന നോട്ടുകളും മാത്രമാണ് മോഷണം പോയത്. തിരക്കേറിയ അന്തർ സംസ്ഥാന പാതയിൽ ഇരിട്ടി പോലീസ് സ്റ്റേഷന് സമീപത്താണ് മോഷണം നടന്നത് എന്നതാണ് കൂടുതൽ ഗൗരവത്തോടെ കാണേണ്ടത്. കൂടുതൽ പണം ബൂത്തിനുള്ളിൽ സൂക്ഷിക്കാതിരുന്നത് വലിയ നഷ്ടം സംഭവിക്കാതെ രക്ഷപ്പെട്ടതായി കട ഉടമ ബാബു പറഞ്ഞു. മോഷണം നടന്നത് കാണിച്ച് കട ഉടമ ഇരിട്ടി പോലീസിൽ പരാതി നൽകി.