‘മുഖ്യമന്ത്രി അഹങ്കാരം ഉപേക്ഷിക്കണം, പാർട്ടിക്ക് വിധേയമാകണം’; വി ഡി സതീശനെതിരെ മഹിളാ കോൺഗ്രസ്

മുഖ്യമന്ത്രി വി.ഡി. സതീശനെതിരെ അതിരൂക്ഷമായ വിമർശനവുമായി മഹിളാ കോൺഗ്രസ് സംസ്ഥാന നേതൃത്വം രംഗത്ത്. മുഖ്യമന്ത്രി തന്റെ അഹങ്കാരം ഉപേക്ഷിക്കണമെന്നും പാർട്ടിക്ക് വിധേയനായി പ്രവർത്തിക്കണമെന്നും ആവശ്യപ്പെട്ട് മഹിളാ കോൺഗ്രസ് സംസ്ഥാന കമ്മിറ്റി യോഗത്തിൽ പ്രമേയം അവതരിപ്പിച്ചു. മഹിളാ കോൺഗ്രസ് നേതൃത്വത്തെ മുഖ്യമന്ത്രി അപമാനിക്കുന്നതായും പാർട്ടി പ്രവർത്തകരോടുള്ള അദ്ദേഹത്തിന്റെ മനോഭാവം ശരിയല്ലെന്നും പ്രമേയത്തിൽ കുറ്റപ്പെടുത്തുന്നു. മഹിളാ കോൺഗ്രസ് തിരുവനന്തപുരം ജില്ലാ പ്രസിഡന്റ് ഗായത്രിയെ മുഖ്യമന്ത്രി പരസ്യമായി അപമാനിച്ചതാണ് നിലവിലെ പ്രതിഷേധത്തിന് പ്രധാന കാരണമായി ചൂണ്ടിക്കാട്ടുന്നത്. മഹിളാ കോൺഗ്രസ് സംസ്ഥാന അധ്യക്ഷ ജെബി മേത്തറുടെ നിർദ്ദേശപ്രകാരം സർക്കാർ നടപ്പിലാക്കേണ്ട വിവിധ പരിപാടികളെ സംബന്ധിച്ച നിവേദനം നൽകാൻ എത്തിയതായിരുന്നു ഗായത്രി. എന്നാൽ നിവേദനത്തിലെ ഉള്ളടക്കം പോലും വായിച്ചു നോക്കാതെ, മറ്റുള്ളവരുടെ മുന്നിൽ വെച്ച് ഗായത്രിയോട് അദ്ദേഹം വളരെ മോശമായി പെരുമാറിയെന്ന് പ്രമേയത്തിൽ പറയുന്നു. “ഭരിക്കാനല്ല സർക്കാർ പ്രവർത്തിക്കുന്നത്” എന്ന മറുപടിയാണ് മുഖ്യമന്ത്രി നൽകിയതെന്നാണ് നേതാക്കൾ ആരോപിക്കുന്നത്. സർക്കാർ അധികാരത്തിലേറി രണ്ട് മാസം തികയുന്നതിന് മുമ്പ് തന്നെ പാർട്ടിക്കുള്ളിൽ വി.ഡി. സതീശനെതിരെ വലിയ രീതിയിലുള്ള അതൃപ്തിയാണ് വളർന്നു വരുന്നത്. വീടുവീടാന്തരം കയറിയിറങ്ങിയും തെരുവിൽ പൊലീസിന്റെ ജലപീരങ്കിയും മർദ്ദനവും ഏറ്റുവാങ്ങിയുമാണ് തങ്ങൾ ഈ സർക്കാരിനെ അധികാരത്തിലെത്തിച്ചതെന്ന് മഹിളാ കോൺഗ്രസ് നേതാക്കൾ ഓർമ്മിപ്പിച്ചു. തങ്ങളുടെ വിയർപ്പിന്റെ വില മനസ്സിലാക്കാതെയാണ് മുഖ്യമന്ത്രി പെരുമാറുന്നതെന്ന രോഷം യോഗത്തിൽ ഉയർന്നു. മുഖ്യമന്ത്രിക്കെതിരെ പാസാക്കിയ ഈ പ്രമേയം കോൺഗ്രസ് ഹൈക്കമാൻഡിന് അയച്ചു നൽകാൻ സംസ്ഥാന കമ്മിറ്റി തീരുമാനിച്ചിട്ടുണ്ട്. നേരത്തെ കെ.എസ്.യു സംസ്ഥാന പ്രസിഡന്റ് അലോഷ്യസ് സേവിയറിനോടും സമാനമായ രീതിയിൽ വി.ഡി. സതീശൻ മുഖം തിരിച്ചുനിന്നത് വലിയ വിവാദമായിരുന്നു. കെ.എസ്.യുവിനും മുതിർന്ന നേതാവ് വി.എം. സുധീരനും പിന്നാലെ ഇപ്പോൾ മഹിളാ കോൺഗ്രസും മുഖ്യമന്ത്രിക്കെതിരെ രംഗത്തെത്തിയത് പാർട്ടിക്കുള്ളിൽ വലിയ ചർച്ചകൾക്ക് വഴിവെച്ചിരിക്കുകയാണ്.