'വൈദ്യുതി പ്രതിസന്ധിക്ക് കാരണം യുഡിഎഫ് സര്‍ക്കാരിന്റെ മിസ് മാനേജ്‌മെന്റ്'; വിമര്‍ശിച്ച് മുഹമ്മദ് റിയാസ്

കോഴിക്കോട്: ഫുട്‌ബോള്‍ ലോകകപ്പ് ഫൈനല്‍ നടക്കുമ്പോള്‍ വൈദ്യുതി പ്രതിസന്ധിയുണ്ടാകാതിരിക്കാന്‍ സര്‍ക്കാര്‍ പ്രത്യേകം ശ്രദ്ധിക്കണമെന്ന് പി എ മുഹമ്മദ് റിയാസ് എംഎല്‍എ. വൈദ്യുതി പ്രതിസന്ധി ഉണ്ടാകില്ലെന്നാണ് സര്‍ക്കാര്‍ പറഞ്ഞിരിക്കുന്നത്. എന്നാല്‍ അത് ഉറപ്പാക്കേണ്ടതുണ്ട്. നേരത്തേയും ഇത്തരത്തില്‍ ഉറപ്പ് പറഞ്ഞിരുന്നെങ്കിലും അതിന് ഫലം കണ്ടിരുന്നില്ല. ഫൈനല്‍ മത്സരം നടക്കുമ്പോള്‍ കറണ്ടുപോയാല്‍ അത് ഗൗരവമേറിയ വിഷയമായി മാറുമെന്നും മുഹമ്മദ് റിയാസ് പറഞ്ഞു. യുഡിഎഫ് സര്‍ക്കാരിന്റെ മിസ് മാനേജ്‌മെന്റാണ് വൈദ്യുതി പ്രതിസന്ധിക്ക് കാരണം. ലോങ് കോണ്‍ട്രാക്റ്റിന് പകരം ഷോര്‍ട്ട് കോണ്‍ട്രാക്റ്റിലേക്ക് പോയി. സംസ്ഥാനത്ത് നിലവില്‍ 400 മുതല്‍ 600 മെഗാവാട്ട് വരെ വൈദ്യുതിയുടെ കുറവുണ്ട്. ആ സ്ഥാനത്ത് 150 മെഗാവാട്ട് വൈദ്യുതി മാത്രമാണ് വാങ്ങിയിരിക്കുന്നതെന്നും റിയാസ് പറഞ്ഞു. മാധ്യമങ്ങളോടായിരുന്നു മുഹമ്മദ് റിയാസിന്റെ പ്രതികരണം.