3,000 മുണ്ടുകളിൽ തീർത്ത ‘മുണ്ടുകളം’; ഏഷ്യാ ബുക്ക് ഓഫ് റെക്കോർഡ്സിൽ ഇടം നേടി വയനാട് സ്വദേശി അനിൽ ചുണ്ടേൽ

പരമ്പരാഗത ഓണക്കാല ആഘോഷങ്ങൾക്ക് വേറിട്ടൊരു കാഴ്ചാനുഭവം സമ്മാനിച്ച് 3,000 മുണ്ടുകൾ ഉപയോഗിച്ച് നിർമ്മിച്ച ഭീമൻ ‘മുണ്ടുകളം’ ഏഷ്യാ ബുക്ക് ഓഫ് റെക്കോർഡ്സിൽ (Asia Book of Records) ഇടംനേടി. ലോകത്തിലെ തന്നെ ആദ്യത്തെ ഈ വേറിട്ട പരീക്ഷണത്തിന് ‘Largest Pookkalam Display Created Using Dhotis’ എന്ന വിഭാഗത്തിലാണ് റെക്കോർഡ് അംഗീകാരം ലഭിച്ചത്.

കൊച്ചി ഫോറം മാളിൽ ഒരുക്കിയ ഈ കലാരൂപത്തിന് ഏകദേശം 32 അടി വ്യാസമുണ്ട്. വിവിധ നിറങ്ങളിലുള്ള മുണ്ടുകൾ കൃത്യമായ അനുപാതത്തിൽ ക്രമീകരിച്ചാണ് ഈ ഭീമൻ പൂക്കള മാതൃക സൃഷ്ടിച്ചെടുത്തത്. പ്രമുഖ വസ്ത്ര ബ്രാൻഡായ റാംരാജ് (Ramraj) സംഘടിപ്പിച്ച ഈ ഇവന്റിന്റെ പ്രോഗ്രാം കോർഡിനേഷൻ നിർവഹിച്ചത് ബ്ലൂ ബെൽ കമ്മ്യൂണിക്കേഷൻസ് (Blue Bell Communications) ആണ്.

സിനിമാ മേഖലയിലെ വി.എഫ്.എക്സ് (VFX) ഡയറക്ടറും പ്രശസ്ത ത്രെഡ് ആർട്ടിസ്റ്റുമായ അനിൽ ചുണ്ടേൽ ആണ് ഈ വേറിട്ട ആശയത്തിന് പിന്നിൽ.

ലോകത്തിലെ ആദ്യത്തെ ട്രാന്സ്പരന്റ് ത്രെഡ് ആർട്ട് (Transparent Thread Art) നിർമ്മിച്ച് ശ്രദ്ധേയനായ കലാകാരനാണ് അദ്ദേഹം.അനിൽ ചുണ്ടേലിനൊപ്പം സുബൻ R-E-C, സെയ്ദ് വയനാട്, ജോബി ചാക്കോ, സലീഷ്, സോമൻ കുറ്റിക്കുളം, സലീഷ് ശങ്കരൻ, ഫായിസ് ആർട്ട് ഗാലറി എന്നിവരും ഈ റെക്കോർഡ് നേട്ടത്തിൽ പങ്കാളികളായി.

പരമ്പരാഗത ഓണക്കലയെ പുതിയൊരു തലത്തിലേക്ക് ഉയർത്തിയ ഈ സംഘം അടുത്ത വലിയ ദൗത്യത്തിനുള്ള തയ്യാറെടുപ്പിലാണ്.

അടുത്ത വർഷം 51 അടി വലുപ്പത്തിൽ ലോകത്തിലെ ആദ്യത്തെ ഭീമൻ ത്രെഡ് ആർട്ട് ചിത്രം നിർമ്മിക്കാനാണ് അനിൽ ചുണ്ടേലും സംഘവും ലക്ഷ്യമിടുന്നത്.