.gif)
ഇരിക്കൂർ: കേരളത്തിലെ രാഷ്ട്രീയ പാർട്ടികൾ മുസ്ലിം ലീഗിനോട് മത്സരിക്കേണ്ടത് ജീവകാരുണ്യപ്രവർത്തനങ്ങളിലാണെന്ന് സംസ്ഥാന മുസ്ലിം ലീഗ് സെക്രട്ടറി അബ്ദുറഹ്മാൻ കല്ലായി പ്രസ്താവിച്ചു. കേരളത്തിനകത്തും പുറത്തും വിദേശരാജ്യങ്ങളിൽ പോലും മുസ്ലിം ലീഗിന്റെ സന്നദ്ധ വളണ്ടിയർമാരുടെ സേവനം മികച്ച മാതൃകയാണ്. ജീവകാരുണ്യ പ്രവർത്തനങ്ങളിൽ മുസ്ലിംലീഗിന്റെ പ്രവർത്തനങ്ങൾ ലോക ശ്രദ്ധയാകർഷിച്ചിട്ടുണ്ടെന്നും ഇത്തരം ജീവകാരുണ്യ പ്രവർത്തനങ്ങൾ മാതൃകയാക്കാൻ മറ്റ് രാഷ്ട്രീയപാർട്ടികൾ തയ്യാറാകണമെന്നും അദ്ദേഹം കൂട്ടിച്ചേർത്തു. മുസ്ലിം ലീഗ് ഇരിക്കൂർ പഞ്ചായത്ത് ശിഹാബ് തങ്ങൾ റിലീഫ് സെല്ലിന്റെ ആഭിമുഖ്യത്തിൽ 3000 കുടുംബങ്ങൾക്കുള്ള പെരുന്നാൾ കിറ്റ് വിതരണവും ദുആ മജ്‌ലിസും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മുസ്ലിം ലീഗ് ഇരിക്കൂർ പഞ്ചായത്ത് പ്രസിഡന്റ് സി.കെ മുഹമ്മദ് മാസ്റ്റർ അധ്യക്ഷത വഹിച്ചു. അബൂബക്കർ ഹാജി ബ്ലാത്തൂർ മുഖ്യാതിഥിയായി. അസീസ് ഫൈസി പേരാമ്പ്ര പ്രാർത്ഥനയ്ക്ക് നേതൃത്വം നൽകി. പി.കെ ശംസുദ്ദീൻ, കെ. മുഹമ്മദ് അഷ്റഫ് ഹാജി, എൻ. വി ഹാഷിം, കെ.പി അഷ്റഫ്, കെ.പി മൊയ്തീൻ കുഞ്ഞി മാസ്റ്റർ, യു.പി അബ്ദുറഹ്മാൻ, എൻ. വി ഹാരിസ്, കെ.പി അബ്ദുള്ള, കെ.കെ കുഞ്ഞി മായൻ മാസ്റ്റർ, എം.പി ഹംസ, എം.പി അഷ്റഫ്, കെ.ടി അനസ്, അഡ്വ എ.പി ജാഫർ സാദിഖ്, എൻ.വി അനസ്, എം.സി അഷ്റഫ്, റഷീദ് കുന്നത്ത്, മുനീർ കുന്നത്ത് എന്നിവർ സംസാരിച്ചു.
