ഹൂസ്റ്റണ്‍: ഒമാന്‍ തീരത്ത് ഇറാന്‍ പിടിച്ചെടുത്ത അമേരിക്കന്‍ എണ്ണക്കപ്പലില്‍ കുടുങ്ങിയിരിക്കുന്നത് മലയാളി അടക്കം 24 ഇന്ത്യക്കാര്‍. ഇറാന്‍ നാവിക സേന പിടിച്ചെടുത്ത കപ്പല്‍ തുറമുഖത്തേക്ക് മാറ്റിയെന്നാണ് റിപ്പോര്‍ട്ടുകള്‍. മോചനത്തിനായുള്ള നടപടികള്‍ തുടരുകയാണെന്ന് കപ്പലിന്റെ ഓപ്പറേറ്റര്‍മാർ അറിയിച്ചു. എറണാകുളം സ്വദേശിയായ എഡ്വിന്‍ ആണ് കപ്പലിലുള്ള മലയാളി. എഡ്വിനെ തിരിച്ചെത്തിക്കാനുള്ള നടപടികള്‍ സ്വീകരിക്കണമെന്ന് കുടുംബം സര്‍ക്കാരിനോട് ആവശ്യപ്പെട്ടു. മാധ്യമങ്ങളില്‍ നിന്നുള്ള വിവരം മാത്രമാണ് തങ്ങള്‍ക്ക് അറിയുകയുള്ളൂ എന്നും എംബസിയുമായി ബന്ധപ്പെട്ടതായും കുടുംബം അറിയിച്ചു.
വ്യാഴാഴ്ച 1.15ന് കുവൈറ്റില്‍ നിന്ന് ഹൂസ്റ്റണിലേക്കുള്ള യാത്രയ്ക്കിടെയാണ് കപ്പല്‍ ഇറാന്‍ നാവിക സേന പിടിച്ചെടുത്തത്. അമേരിക്കന്‍ കപ്പല്‍ തങ്ങളുടെ കപ്പലുകളില്‍ ഒന്നില്‍ ഇടിച്ചെന്നും ഇതിലുണ്ടായിരുന്ന രണ്ട് പേരെ കാണാതാവുകയും നിരവധി പേര്‍ക്ക് പരുക്കേല്‍ക്കുകയും ചെയ്തതായും ഇറാന്‍ പ്രതികരിച്ചു. ഇറാന്റെ നടപടി രാജ്യാന്തര നിയമങ്ങള്‍ക്ക് വിരുദ്ധമാണെന്നും പ്രാദേശിക സുരക്ഷയെ അപമാനിക്കുന്നതാണെന്നും അമേരിക്കന്‍ അധികൃതര്‍ പറഞ്ഞു. ഇറാന്റെ ഇത്തരത്തിലുള്ള ഇടപെടല്‍ അവസാനിപ്പിക്കണമെന്നും അവര്‍ ആവശ്യപ്പെട്ടു.
.jpg)
.jpg)
