യുഎസിലെ ബാള്ട്ടിമോറിലെ ഫ്രാന്സിസ് സ്കോട്ട് കീ പാലം കണ്ടെയ്നര് കപ്പല് ഇടിച്ചതിനെ തുടര്ന്ന് തകര്ന്നു. ചൊവ്വാഴ്ച രാവിലെ 1.30ഓടെയാണ് സംഭവം. അപകടത്തിന്റെ ഞെട്ടിക്കുന്ന ദൃശ്യങ്ങളാണ് പുറത്തുവന്നിരിക്കുന്നത്. പാലത്തിന്റെ സ്റ്റീല് ആര്ച്ചുകള് തകര്ന്ന് പറ്റാപ്സ്കോ നദിയിലേക്ക് വീഴുന്നത് വീഡിയോയില് കാണാം.2.6 കിലോമീറ്റര് നീളമുള്ള പാലത്തില് ആ സമയം എത്ര വാഹനങ്ങള് ഉണ്ടായിരുന്നു എന്ന കാര്യത്തില് കൃത്യമായ കണക്കുകളില്ല. സിനര്ജി മറൈന് ഗ്രൂപ്പിന്റെ ചരക്കുകപ്പലായ ഡാലിയാണ് പാലത്തിലെ ഒരു തൂണില് വന്നിടിച്ചത്. ആ സമയം നിരവധി വാഹനങ്ങള് കടന്നുപോകുന്നുണ്ടായിരുന്നു എന്നാണ് നിഗമനം. ആദ്യം ഏഴോളം പേര് വെള്ളത്തില് വീണതായാണ് റിപ്പോര്ട്ട് വന്നത്. ഇപ്പോള് ഏകദേശം ഇരുപതോളം പേരാണ് നദിയില് പതിച്ചതെന്നാണ് ബാള്ട്ടിമോര് സിറ്റി ഫയര് ഡിപ്പാര്ട്ട്മെന്റിന്റെ റിപ്പോര്ട്ട്