.gif)
ഇരിട്ടി: പാലത്തിന് സമീപം ശുചിത്വ നിര്‍ദേശങ്ങള്‍ പാലിക്കാതെ പ്രവര്‍ത്തിച്ച 2 തട്ടുകടകള്‍ പായം പഞ്ചായത്ത്‌ - ആരോഗ്യ വകുപ്പ്‌ അധികൃതര്‍ ചേര്‍ന്ന്‌ പൂട്ടിച്ചു. തളിപ്പറമ്പ്‌ റോഡരികില്‍ മരാമത്ത്‌ സ്ഥലത്ത്‌ പന്തല്‍കെട്ടിയായിരുന്നു തട്ടുകടകളുടെ പ്രവര്‍ത്തനം. ഇവിടെ നിന്ന്‌ മലിന ജലം ഓവുചാല്‍ വഴി പഴശ്ശി സംഭരണിയിലേക്ക് ഒഴുക്കുന്നതായി നേരത്തേ പരാതി ഉയര്‍ന്നിരുന്നു. 2 മാസം മുന്‍പ്‌ അധികൃതര്‍ പരിശോധന നടത്തി ഇവ താല്‍ക്കാലികമായി പൂട്ടിക്കുകയും തെറ്റുകള്‍ തിരുത്തണമെന്ന്‌നിര്‍ദേശം നല്‍കുകയും ചെയ്തിരുന്നു. ഇതനുസരിച്ച്‌ മതിയായ ശുചിത്വ സംവിധാനങ്ങള്‍ ഏര്‍പ്പെടുത്തിയതായി പറഞ്ഞ്‌ തട്ടുകള്‍ വീണ്ടും തുറന്നു. ഇന്നലെ ആരോഗ്യ - പഞ്ചായത്ത്‌ സംഘം വീണ്ടും പരിശോധന നടത്തുമ്പോള്‍ മലിനജലം ഓവുചാല്‍ വഴി പഴശ്ശി ജലസംഭരണിയിലേക്കാണ്‌ ഒഴുക്കിവിടുന്നതെന്നും, വൃത്തിഹീനമായ ചുറ്റുപാടുകളിലാണ്‌ തട്ടുകടകള്‍ പ്രവര്‍ത്തിക്കുന്നതെന്നും കണ്ടെത്തുകയും തുടര്‍ന്നു കര്‍ശന നടപടി സ്വീകരിക്കുകയുമായിരുന്നു. യാതൊരുവിധ ലൈസന്‍സും ഇല്ലാതെയാണ്‌ തട്ടുകടകള്‍ പ്രവര്‍ത്തിച്ചിരുന്നതെന്നും അധികൃതര്‍ പറഞ്ഞു. ഹെല്‍ത്ത്‌ ഇന്‍സ്പെക്ടര്‍ മോഹന്‍ദാസ്‌, ജെ.എച്ച്‌.ഐ.മാരായ മുഹമ്മദ്‌ സലീം, മനോജ്‌ ജേക്കബ്‌ ഉള്ളാട്ടില്‍, അബ്ദുല്ല, പായം പഞ്ചായത്ത്‌ ജൂനിയര്‍ സൂപ്രണ്ട്‌ ലതീഷ്‌ എന്നിവര്‍ പരിശോധനയ്ക്കു നേതൃത്വം നല്‍കി.
