കോഴിക്കോട് ലൈറ്റ് മെട്രോ റൂട്ടില്‍ മാറ്റം; ആദ്യ ഘട്ടത്തില്‍ രണ്ട് കോറിഡോറുകള്‍; പരിഗണനയില്‍ ഈ പാതകള്‍

 

കോഴിക്കോട്: കോഴിക്കോട് നഗരത്തിന്‍റെ ഗതാഗത കുരുക്കിന് പരിഹാരമാകാന്‍ ലൈറ്റ് മെട്രോ വരുന്നു. ആദ്യ ഘട്ടത്തില്‍ ലൈറ്റ് മെട്രോയ്ക്ക് പരിഗണിക്കുന്ന പാതകള്‍ക്ക് തീരുമാനമായി. ആദ്യഘട്ടത്തിൽ 27.1 കിലോമീറ്റർ ദൂരമുള്ള രണ്ട് കോറിഡോറുകളാണ് പരിഗണിക്കുന്നത്. ഏറ്റവും തിരക്കുകളുള്ള റൂട്ടുകള്‍, സ്ഥലങ്ങള്‍ എന്നിവ കണക്കാക്കിയാണ് ലൈറ്റ് മെട്രോയ്ക്ക് പാതകള്‍ നിര്‍മിക്കുന്നത്.ആദ്യ കോറിഡോര്‍- തെക്കുവടക്ക് ദിശയില്‍ വെസ്റ്റ്ഹില്‍- നടക്കാവ്- മീഞ്ചന്ത- ചെറുവണ്ണൂര്‍- രാമനാട്ടുകര എന്നീ റൂട്ടിലും രണ്ടാമത്തെ കോറിഡോര്‍- കിഴക്കുപടിഞ്ഞാറ് ദിശയില്‍ മെഡിക്കല്‍ കോളേജ്- തൊണ്ടയാട്- കോഴിക്കോട് ബീച്ച് റൂട്ടിലുമാണ് നിര്‍മിക്കുക. വെസ്റ്റ്ഹില്‍- രാമനാട്ടുകര കോറിഡോറിന് 19 കിലോമീറ്ററും മെഡിക്കല്‍ കോളേജ്- ബീച്ച് കോറിഡോറിന് 8.1 കിലോമീറ്ററുമാണ് ദൈര്‍ഘ്യം. നഗരത്തിന്‍റെ ഗതാഗത കുരുക്കിന് പരിഹാരമായി മെട്രോ റെയില്‍ പോലുള്ള ഗതാഗത സംവിധാനം ആവശ്യമാണെന്ന് സമഗ്ര മൊബിലിറ്റി പ്ലാന്‍ കരട് റിപ്പോര്‍ട്ടിന്‍റെ ഭാഗമായി നടന്ന ചര്‍ച്ചയിലാണ് വിലയിരുത്തല്‍.