.gif)
അംബേദ്കർ ഗ്രാമം പദ്ധതിയിൽ ഉൾപ്പെടുത്തി കുഞ്ഞിമംഗലം ഗ്രാമപഞ്ചായത്തിലെ എടാട്ട് വള്ളുവ കോളനിയുടെ സമഗ്ര വികസന പ്രവർത്തനങ്ങൾക്ക് തുടക്കമായി. എം വിജിൻ എം എൽ എ പ്രവൃത്തി ഉദ്ഘാടനം ചെയ്തു. കോളനിയുടെ വികസന പ്രവൃത്തികൾക്കായി 50 ലക്ഷം രൂപയാണ് സർക്കാർ അനുവദിച്ചത്. ദേശീയപാതയിൽ നിന്ന് ആരംഭിക്കുന്ന പെരുമ്പ പാലം-വള്ളുവ കോളനി റോഡ് നവീകരിക്കും. 200 മീറ്റർ നീളത്തിൽ ഇരുവശവും കരിങ്കൽ കെട്ടി മുകളിൽ കോൺക്രീറ്റ് ബെൽറ്റ് നിർമിച്ച് മണ്ണിട്ടുയർത്തി ടാർ ചെയ്യും. റോഡ് നവീകരിക്കുന്നതോടെ പ്രദേശത്തെ വെള്ളക്കെട്ടിന് പരിഹാരമാകും. കോളനിയിലെ കമ്യൂണിറ്റി ഹാൾ നവീകരണവും പദ്ധതിയിലുണ്ട്. കണ്ണൂർ നിർമിതി കേന്ദ്രത്തിനാണ് നിർമാണ ചുമതല. ആറ് മാസത്തിനകം പ്രവൃത്തി പൂർത്തിയാക്കാനാണ് നിർദേശം. കോളനിയിൽ നടന്ന ചടങ്ങിൽ പയ്യന്നൂർ ബ്ലോക്ക് പഞ്ചായത്ത് പ്രസിഡണ്ട് പി വി വത്സല അധ്യക്ഷത വഹിച്ചു.
കുഞ്ഞിമംഗലം പഞ്ചായത്ത് പ്രസിഡണ്ട് എ പ്രാർഥന മുഖ്യാതിഥിയായി. ജില്ലാ നിർമിതി കേന്ദ്രം പ്രൊജക്ട് എഞ്ചിനീയർ കെ രാമചന്ദ്രൻ റിപ്പോർട്ട് അവതരിപ്പിച്ചു. പയ്യന്നൂർ ബ്ലോക്ക് പട്ടികജാതി വികസന ഓഫീസർ എം ബാലകൃഷ്ണൻ, ജില്ലാപഞ്ചായത്തംഗം സി പി ഷിജു, ബ്ലോക്ക് പഞ്ചായത്തംഗം കെ പി റീന, വാർഡ് അംഗം കെ ജിഷ ബേബി, എസ് സി പ്രൊമോട്ടർ ശ്രുതി സി ചന്ദ്രൻ എന്നിവർ സംസാരിച്ചു.
