ആറളം പഞ്ചായത്തിലെ പാലരിഞ്ഞാൽ പ്രദേശത്തെ കല്ലുമൂല റോണി എന്ന ചെറുപ്പക്കാരന് വേണ്ടിയാണ് സഹായഹസ്തവുമായി യുവാക്കൾ രംഗത്തെത്തിയത്. റോണിയുടെ ചികിത്സയ്ക്കായി പണം സമാഹരിക്കാൻ വേറിട്ട രീതിയാണ് ഇവർ കണ്ടെത്തിയത്. ബിരിയാണി ചലഞ്ചിലൂടെ 2 ലക്ഷം രൂപ സമാഹരിച്ച് ചികിത്സക്കായി നൽകാനാണ് ഇവരുടെ തീരുമാനം. പാലരിഞ്ഞാൽ പ്രദേശത്ത് പ്രവർത്തിക്കുന്ന ബ്ലാക്ക് ക്യാപ്സ് കീഴ്പ്പള്ളി എന്ന സ്പോർട്സ് ക്ലബിന്റെ നേതൃത്വത്തിൽ 70 ഓളം യുവാക്കളാണ് നാടിന് മാതൃകയായി ജീവകാരുണ്യ പ്രവർത്തിൽ ഏർപ്പെട്ടത്. റോണി ഇപ്പോൾ ഗുരുതര പരിക്ക് പറ്റി മംഗലാപുരം സഞ്ജീവനീ ഹോസ്പിറ്റലിൽ ചികിത്സയിലാണ്. നിർദ്ധന കുടുംബാംഗമായ റോണിക്ക് ചികിത്സാ ചിലവ് താങ്ങാവുന്നതിലും അപ്പുറമാണെന്ന തിരിച്ചറിവാണ് ഈ യുവാക്കളെ ബിരിയാണി ചലഞ്ചിലേക്ക് നയിച്ചത്.
മൂവായിരം ബിരിയാണി വിറ്റഴിക്കാനാണ് തീരുമാനം. ഇതിന്റെ ഭാഗമായി യുവാക്കൾ ഗ്രൂപ്പായി തിരിഞ്ഞ് വീടുകൾ തോറും കയറി ഇറങ്ങി ഓഡർ സ്വീകരിച്ചു. ശനിയാഴ്ച്ച രാത്രി മുതൽ ബിരിയാണി പാകം ചെയ്യാനുള്ള ജോലിയിൽ ഏർപ്പെട്ട യുവാക്കൾ ഞായറാഴ്ച പേക്കിംഗ് നടത്തി വീടുകളിൽ എത്തിച്ചു. നാട്ടുകാരും ഇവരോടൊപ്പം ചേർന്നതോടെ ഇരട്ടി ആവേശമായിമാറി. നൻമ വറ്റുന്ന ലോകത്ത് നൻമയുടെ നീരുറവകളാകാൻ ഇനിയും ഇതു പോലെ യുവാക്കൾ മാതൃകയാകട്ടെയെന്ന പ്രത്യാശയിലാണ് നാട്ടുകാർ.
റിപ്പോർട്ട്: കെ.ബി. ഉത്തമൻ