.gif)
കോഴിക്കോട് - കണ്ണൂര്‍ ദേശീയ പാതയിലെ മുഴപ്പിലങ്ങാട് മഠം റെയില്‍വേ മേല്‍പാലത്തില്‍ തമിഴ്‌നാട്ടില്‍ നിന്നും മുട്ടകയറ്റിക്കൊണ്ടുവന്ന ലോറി നിയന്ത്രണം വിട്ടു മറിഞ്ഞ സംഭവത്തില്‍ പൊലീസ് കേസെടുത്തു.അപകടത്തില്‍ ഒന്നര ലക്ഷത്തോളം കോഴിമുട്ടകള്‍ റോഡില്‍ വീണുപൊട്ടിയതിനെ തുടര്‍ന്ന് പ്രദേശവാസികള്‍ക്ക് ദുര്‍ഗന്ധമുണ്ടാക്കിയെന്ന പരാതിയിലാണ് എടക്കാട് പൊലീസ് നാമക്കല്‍ സ്വദേശിയായ ലോറി ഡ്രൈവര്‍ക്കെതിരെ അശ്രദ്ധമായി വാഹനമോടിച്ചതിന് കേസെടുത്തത്.തലശേരി ഭാഗത്തു നിന്നും കണ്ണൂരിലേക്ക് പോവുകയായിരുന്ന ചരക്കു ലോറിയാണ് നിയന്ത്രണം വിട്ടു മറിഞ്ഞത്. കോഴി മുട്ടയുമായി തമിഴ്‌നാട്ടിലെ നാമക്കലില്‍ നിന്ന് എത്തിയതായിരുന്നു. ഞായറാഴ്ച രാവിലെ ഏഴുമണിയോടെയാണ് അപകടമുണ്ടായത്. മുട്ട റോഡില്‍ തെറിച്ച്‌ ഗതാഗതം ദുഷ്‌കരമായി. ഏറെ നേരം ഇതുവഴിയുള്ള ഗതാഗതവും മുടങ്ങി. ലോറിയിലുണ്ടായിരുന്ന ജീവനക്കാര്‍ വലിയ പരുക്കില്ലാതെ രക്ഷപ്പെട്ടു. ഇവര്‍ തലശേരി ജനറല്‍ ആശുപത്രിയില്‍ ചികിത്സ തേടിയിട്ടുണ്ട്.
