ചെക്കിയയെ കീഴടക്കി സ്പെയിൻ! ലാമിൻ യമാലിനും റോഡ്രിക്കും ഗോൾ

നാഷൻസ് ലീഗ് പോരാട്ടത്തിൽ ചെക്കിയയെ ഒന്നിനെതിരെ മൂന്ന് ഗോളുകൾക്ക് പരാജയപ്പെടുത്തി സ്പെയിൻ തകർപ്പൻ വിജയം സ്വന്തമാക്കി. മത്സരം തുടങ്ങി ആറാം മിനിറ്റിൽ തന്നെ യുവതാരം ലാമിൻ യമാലിലൂടെ സ്പെയിൻ മുന്നിലെത്തി. 35-ാം മിനിറ്റിൽ റോഡ്രി രണ്ടാം ഗോളും നേടി ടീമിന്റെ ലീഡ് ഉയർത്തി. രണ്ടാം പകുതിയിൽ 69-ാം മിനിറ്റിൽ ഡൊമിനിക് സ്ലാമയിലൂടെ ചെക്കിയ ഒരു ഗോൾ തിരിച്ചടിച്ചെങ്കിലും 89-ാം മിനിറ്റിൽ മൈക്കൽ മെറീനോ മൂന്നാം ഗോളും നേടി സ്പെയിനിന്റെ വിജയം പൂർത്തിയാക്കി. ഈ ​ഗംഭീര വിജയത്തോടെ ​ഗ്രൂപ്പ് എ3യിൽ ഇം​ഗ്ലണ്ടിനെ മറികടന്ന് സ്പെയിൻ ഒന്നാമതെത്തി. തുടർച്ചയായ 41 മത്സരങ്ങളിൽ തോൽവി അറിയാതെയാണ് ലാ റോജയുടെ വിജയം. മത്സരത്തിന്റെ ആറാം മിനിറ്റിൽ തന്നെ അത്ഭുത ​ഗോളിലൂടെ ലാമിൻ ടീമിന്റെ വിജയം ഉറപ്പിച്ചിരുന്നു. തുടർച്ചയായ മൂന്നാം മത്സരത്തിലാണ് ലാമിൻ യമാൽ വലകുലുക്കുന്നത്. സ്പാനിഷ് കോച്ച് ലൂയിസ് ഡാ ലിന്റെയെ പോലും അതിശയിപ്പിച്ച ​ഗോളായിരുന്നു അത്. മത്സരത്തിന്റെ ആദ്യ 20 മിനിറ്റിൽ സ്പെയിനിന്റെ പൂർണ്ണ ആധിപത്യമാണ് കണ്ടത്. 35ാം മിനിറ്റിൽ ബോക്സിനുള്ളിൽ ലഭിച്ച പന്ത് അതിമനോഹരമായി വലയിലെത്തിച്ച് റോ​ഡ്രി ​ഗോൾ നില രണ്ടായി ഉയർത്തി.